ب ملیارا دیناران پێلەكا دی یا گرێبەستان د مێركاتۆ یا هاڤینێ دایە
قەیس وەیس:
بزاڤێن یانەیێن كوردستانی و ئیراقێ بۆ ئیمزاكرنا یاریزانێن نوو ل گەل تیمێن وان خوە بەرهەڤكرن بۆ وەرزێ نووی ێ خولا ستێرێن ئیراقێ یا فوتبۆلێ، د دووماهی بزاڤێن چەند یانەیان دا گرێبەستێن ئاگرین هەتا نوكە گەهشتینە ملیار دیناران تایبەت ژلایێ یانەیێن، زەورا، شورتە و زاخۆ و دهێتە چاڤەڕێ كرن د ڤێ حەفتیێ ژی دا چەندین گرێبەستێن دی ژی بهێتە ڕاگەهاندن.
زاخۆ گۆلكەرێ خولا ئیراقێ ئینا
ب شێوەیەكێ فەرمی یانەیا زاخۆ گرێبەستا هێرشبەرێ ئۆزپاكستانی شیرزۆد تیمیرۆڤ گۆلكەرێ خولا ئیراقێ و پێتر یانەیا هەولێرێ ئیمزاكر بۆ وەرزێ نوو، ل دووڤ ژێدەرێن ڕژنامەڤانی گرێبەستا وی بۆ ماوەیێ سێ وەرزان گەهشتییە پێنچ ملیار و 500 ملیۆن دیناران، شیرۆزد د وەرزێ بۆری دا گۆلكەرێ خولا ستێرێن ئیراقێ بوو ب28 گۆلان، ژلایەكێ دووڤە یانەیا زاخۆ یا بزاڤێ دكەت ژبۆ ڕازیكرنا ستێرێ كوردستانی و هەلبژارتیێ ئیراقێ ئاكام هاشم بۆ ئیمزاكرنا گرێبەستا وان كو دگەهیتە 900 ملیۆن دیناران.
زەورا و شورتە مێركاتۆ شاڕاند
ژلایێ خوە یانەیا زەورا ب گرێبەستێن گران بوهان چەند یاریزانێن پیشەكارو ئیراقی ئیناینە دناڤ ڕێزێن تیما خوە دا، ئینانا چار یاریزانان گرێبەستێن وان گەهشتینە پێنچ ملیار بتنێ د ئێك وەرز دا و بڤی شێوەیی، ستێرێ بەرێ یێ هەلبژارتیێ ئیراقێ عەلی عەدنان، هەردو یاریزانێن ئۆرۆگوایی مایكل كابرێرا و نیكۆلاس فراندێز، یێ كرواتی مارلین چۆپانۆڤ، ژلایەكێ دووڤە یانەیا شورتە شەش ملیار ل سەر چار یاریزانان مەزاختییە و بڤی شێوەیی یێ ڤەنزوێلی رۆبێن ڕامیرێز، یێ نێجیری فێدلێس كۆكۆ، یێ ئەرجەنتینی كرێستیان باركۆ و یێ كۆلۆمپی دیێگۆ هێرناندز.
