ب ناڤ و ئالایێ كوردستانێ پێنج میدالیێن هانمەدانگ ب دەستڤە ئینان
محەمەد عەلی:
تیما هەلبژارتیێ كوردستانێ بۆ یارییا تایكواندۆیێ شیان ئەنجامێن سەرفەراز ب دەستڤە ئینانا میدالیەكا زێری، سێ زیڤ و ئێك برۆنزۆی د قارەمانییا نێڤدەولەتی هانمدانگی بۆ سیستەمێ شكاندنا دەپی و سیرامیكی، د هەڤڕكیێن واندا ئەوا دوهی سیئۆلا پایتەختێ وەلاتێ كۆریا باشۆر هاتیە كرن.
لدۆر ڤێ دەستكەڤتێ و زێدەتر زانیاری هێمن مەهدی قادر سەرۆك شاند و ڕاهێنەر و هەمان دەمدا یاریزان بۆ ئەڤرۆ گۆت: قارەمانیی نێڤدەولەتی 2026 هانمەدانگ یا شكاندنا دەپی ئێك ژ ب هێزترین قارەمانیێن جیهانی نە د چارچووڤەیێ یارییا تایكواندۆیێ دا، د چاپا وەرزێ ئەڤ سالە دا مەزنترین كەرنەڤالێ پشكداریێ بوو كو شەش هزار یاریزان ژ 69 وەلاتان پشكدار بوون، هەڤڕكییەكا ب هێز د ناڤبەرا یاریزانێن كوڕ و كچ بۆ سیستەم و ژیێن جودا د هاتە كرن، خوەشبەختانە یاریزانێن مە شیان ئەنجامێن دلخوەشكەر و ڕێژەیا میدالییان زێدەتر ژ سالێن بۆری بكەن، ئەنجامێن وان بڤی شێوەیی بوون.
بۆ شێوازێ شكاندنا بلەز هێمن مەهدی قادر وەكو یاریزان پشكداربووم و شیام ل ڕێزا دویێ بهێم و میدالییا زیڤی ب دەستڤە بینم.
بۆ یاریزانێن ل بن ژیێ 18 سالی دا د دشێوازێن جودا بنیامێن ئیمان ڕێزا ئێكێ و ڕێزا سێیێ بۆ یارییەكا دی یا جودا هات ئانكو میدالییا زێری و میدالییا برۆنزی ب دەستڤە ئینا.
بۆ شێوازێ شكاندنا ب هێز یەلدا محەمەد شیا ڕێزا دویێ بهێت و میدالییا زیڤی ب دەستڤە بنیت.
بۆ ژیێن ل سەر18 سالی دا یاریزانێ مە حامد شیا ڕێزا سێیێ بهێت و میدالییا زیڤی ب دەستڤە بنیت.
ژلایەكێ دووڤە ناڤهاتی گۆت: دەستخوەشیێ ل هەموو یاریزانان دكەین كو ئەڤ دەستكەڤتێن دیرۆكی ب دەستڤە ئیناین و دلخوەشیا مە ئەو بوو ب ئالایێ پیرۆز یێ كوردستانێ و ناڤێ كوردستانێ ئەڤ شیان ب دەستكەڤت ڤەگەڕین، ئەڤە ژی بەلگەیە ل سەر هەبوونا یاریزانێن خودان شیان ل كوردستانێ كو شیانێن هەیین ئەنجامێن سەرفەراز ب دەستڤە بینن.
بۆ زانین ل سالا 2024ێ هێمن مەهدی قادر شیابوو ڕیكۆردا جیهانی بۆ شكاندنا دەپی كو گەهشتبوونە 16 دەپان و ناسناڤێ شاهێ شكاندنێ بوو هاتە دانان.
