جۆتیار عەلی: پشتەڤان و مۆرالا یاریزانان چەكێ مەیە بۆ سەركەڤتنا ئەڤرۆ
قەیس وەیس:
جەماوەرێن كوڕێن خابۆری ئەڤرۆ ل دەمژمێر پێنجێ ئێڤاری ب ژڤانن بۆ پشتەڤانییا تیما خوە وئاهنگگێرانا سەركەڤتنێ بۆ فینالێ، دەمێ تیما وان دناڤ ئەرد و جەماوەرێ خوە دا یانەیا نەفت میسان مێڤانكەت، د چارچووڤەیێ هەڤڕكیێن قووناغا چارگۆشەیا زێرین ژ گەڕا دویێ و ئێكلا كەر بۆ یارییا دووماهییا خولا ئیراقێ یا باسكێت بۆلیً، ئەوا دێ ل هۆلا گرتییا بنگەهێ وەرزشی ل زاخۆ هێتە كرن.
تیما باسكێت بۆلا یانەیا زاخۆ یارییا خوە یا ئێكێ و چوونێ بەرانبەر خودانێن ئەردی یانەیا نەفت میسان شیا سەركەڤتنەكا گرنگ و ژ هەژی بینیت ب 71 خالان بەرانبەر 67 خالان، دهەمان قووناغ دا یانەیا دیفاع ئەلجەوی ب سەركەڤت ل سەر یانەیا حەشد ئەلشەعبی ب 100 خالان بەرانبەر 90 خالان، یاریێن ئەڤرۆ هەكە یانەیێن زاخۆ و دیفاع ئەلجەوی ب سەركەڤتن ئێكسەر دێ دەربازبنە فینالێ، لێ هەكە تووشی خوسارەتیێ بوون دێ یارییەكا دی یا ئێكلاكەر كەن.
ژبۆ وەرگرتنا دووماهی زانیاریێن تیما زاخۆ و بەرهەڤیێن وان جوتیار عەلی ڕاهێنەرێ تیمێ بۆ رۆژنامەیا ئەڤرۆ گۆت: پشتی د یارییا بۆری دا ب سەرفەرازی ئەم شیایین پێنگاڤەكا باش پاڤێژن و ب سەركەڤین، ئەڤرۆ دێ هەموو بزاڤان كەین سەركەڤتنا خوە ل سەر نەفت میسان دوبارە بكەین پێخەمەت دەستڤەئینانا پلێتا یارییا دووماهیێ كو ئەڤ پلێتە ئێك ژ خەونێن مە یێن چەندی سالانە ئەم پێڤەدبینن، لەوما ژی بەرهەڤیێن تایبەت هاتینە كرن و ڕژدین ب گەهینە ئارمانجا خوە.
هەروەسان ناڤهاتی گۆت: چەكێ مە بۆ سەركەڤتنا ئەڤرۆ پشتەڤان و یاریزانێن زاخۆ نە، دڤێت هەموو بزاڤان بكەین نە هێلین بچینە یارییا سێیێ یا ئێكلاكەر ژبەركو دێ ئەركێ مە ب زەحمەتر ئێخیت، چنكو یارییا سێیێ دێ ل باژێرێ میسان بیت، ئەڤچا یا دشیان دا بیت هەموو یاریزان دێ شەڕی بۆ ب دەستڤە ئینانا خالان كەن پێخەمەت سەركەتن و دەربازبوون بۆ فینالێ كو ئێك ژ خەونێن مە یێن هەرە مەزنن.
بۆ زانی لدووڤ خشتەیێ چارگۆشەیا زێڕین هاتیە بەلاڤكرن هەكە پێدڤی ب یارییا سێیێ و ئێكلاكەر بوون ژڤانێ وێ دێ بڤێ شێوەیی بیت، یارییا سێیێ دێ ل 26ێ ڤێ مەهێ بیت، د هەمان رۆژ دا یارییا ئێكێ یانەیا دیفاع ئەلجەوی دێ یانەیا ئەلحەشد شەعبی كەت.
