جینۆسـایدا ئێزدیـان نـەدهێتە ژبیركـرن و نـەژی سـارێـژ دبیت
دلڤین رەشید
جینۆسایدا ئێزدیان برینەكا هەردەم خویناوی و ناڤەك د لاپەرێن نە دارشتی یێن دیرۆكێ دا، هەردەم یا تژییە ژ سەرهاتیێن نڤێسین و تۆمارێن جۆرا و جۆر، بەلێ وەكی سەرهاتیا جینۆسایدا ئێزدیان دژوارتر و دل تەزینتر كێم د لاپەرێن دیرۆكێ دا هاتینە دیتن، ئەڤ جینۆسایدا شنگالێ كو كەفت بوو د چەرخێ بیست وئێكێ دا، نیشانا وێ ئێكێ بوو كو جیهان هێشتا نەبوویە جهەكێ تەنا بۆ كەمینەیەكا ئۆلی یە كەڤنار جارەك دن سەلماندن كو مرۆڤایەتی دشێت د بەرانبەر كەتنا مرۆڤی دا بێدەنگ بمینن.
برینا شنگالێ نە برینەكا جهی بوو، بەلكو كەتنا جڤاكەكێ بوو كو هەتا ئەڤرۆ ژی جهێ ئێشا برینا وێ یە بەردەوامە، جینۆسایدەك بوو كو تێدا ب سەدان مرۆڤ هاتنە كوشتن و هزاران زارۆك و ئافرەت هاتنە رەڤاندن و كوێلەكرن، جڤاكەكا مینا شنگالێ ب تەمامی ژ جه و وارێ خۆ هاتنە دەربەدەركرن.
ئەوا ڤێ برینێ كورتر و دژوارتر دكەت ئەوە كو هێشتا چارەسەریێن تەمامی بۆ ژین و ژیانا خەلكێ شنگال نەهاتیە دیتن و چ دادپەروەریەكا راستەقینە بۆ قوربانیان نەهاتیە ڤەدیتن، نەژی دەرمانەك ژبۆ سارێژكرنا دلێن دایك و بابێن ئەوێ هەتا ئەڤرۆ چاڤەرێی ڤەگەریانا رەڤاندیێن خۆ دكەن هاتیە دیتن.
برینەكا كو هەتا ئەڤرۆ ژی برینا وێ ژ هزرێن جیهانێ و دەڤەرێ نەهاتیە ژێبرن، چونكی هەتا نۆكە ژی هەزاران ئافرەت و كچێن شنگالا خۆراگر چارەنڤیسێ وان دیار نینە و پسیارا دادپەروەریێ وێ د رەهێن هەوای دا ماینە هەلاویستی.
جینۆسایدا شنگالێ ئەزموونەكا گران بوو كو دڤێت دیرۆك د چاڤەكی بێ لایەن دا تۆمار بكەت. ئەڤ كارەسات نە روودانەك بوو، بەلكی جینۆسایدەك مەزن بوو ب سەرێ مللەتێ مە هاتی، هەتا وێ گاڤا زیان لێكەفتی نەهێنە قەرەبۆكرن و دادپەروەری نەهێتە چەسپاندن ئەو برینە دێ یا گرژ و سارێژ نەبووی.
