جەگەر عەلی: مە داخوازكرییە هەر پێنج یاریێن فینالێ مێڤان بكەین
د داخویانیەكێ دا سەرپەرشتێ تیما باسكێت بۆلا یانەیا زاخۆ دیار كر ب نڤێسارەكا فەرمی مە داخاز ژ فدراسیۆنا باسكێت بۆلا ئیراقێ كرییە هەر پێنج یاریێم فینالا خولا ئیراقێ یا پیشەكاران ل باژێرێ زاخۆ مێڤان كەین و گەشبینن دێ ڕازیبوون هەبیت.
زێدەتر ناڤهاتی بۆ رۆژنامەیا ئەڤرۆ گۆت: پشتی ب سەرفەرازی تیما مە دەربازبوویە فینالا خولا ئیراقێ ئێكسەر كارگێرییا یانەیێ هزر د هندێ دا كر كو داخازا مێڤانداریكرنا هەر پێنج یاریێن فینالێ ژ فدراسیۆنا ئیراقێ بكەت، پێنەڤێت ئەڤ داخازییە ژی ژبەر چەند ئەگەران بوویە، یا ئێكێ بۆ خاترا جەماوەرێ مە یێ دلسۆز هەر دبەرانبەر دا ژی بۆ فدراسیۆنێ باشییەكە ژبەركو بتنێ ل یاریێن زاخۆ دناڤا هۆلا زاخۆ دا پشتەڤانێن ئێكچار زوور بەرهەڤدبەن و ئەو ب خوە ژی پەسنا جەماوەرێ مە دكەن.
هەروەسانا جەگەر عەلی گۆت: خالا دویێ یا گرنگ ل هۆلێن دناڤا بەغدا سیستەمێ ساركرنا هۆلێ نینە، ئانكو یاریزان و پشتەڤان و دادڤان دێ تووشی گەرمێ بن و دێ كارتیكرن ل سەر بڕێڤەچوونا یاریگەهێ هەبن، بەرۆڤاژی هۆلا گرتییا یانەیا زاخۆ ڕێكخستییە ب سیستەمێ پلەیێن سار و هۆل یا بەرهەڤە ب هەموو شێوەیەكی، خالا دی یا گرنگ ئەوە كارگێرییا یانەیێ هەموو مەزاختیێ تیما مێڤان، دادڤان و لژنەیا سەرپەرشت ب ستویێ خوە ڤەگرتییە.
ژلایەكێ دووڤە سەرپەرشتێ تیما زاخۆ گۆت: مە ب نڤێسارا فەرمی ئاراستەیی فدراسیۆنێ كرییە و هەروەسان مە داخواز ژ یانەیا دیفاع ئەلمەدەنی كرییە كو ڕازی بیت هەر پێنج یاریێن خوە ل باژێرێ زاخۆ بكەت، ئەز گەشبینم دێ یارییا فینالێ هێتە زاخۆ، لێ هەكە ڕازیبوون ژی نە هاتە دان ئەم هەر بەردەوامین و ڕژدین و گەشبینن دێ شەڕی هەتا دوومای یاری كەین بۆ دەستڤە ئینانا ناسناڤی.
بۆ زانین تیما زاخۆ پلێتا دەربازبوون بۆ فینالێ ب دەستڤە ئینا پشتی د دیارییا دویێ ژ چارچووڤەیێ قووناغا چارگۆشەیا زێرین سەركەڤتنێ ل سەر هەڤڕكا خوە نەفت میسان ئینایی ب ئەنجامێ 81 – 51، د یارییا ئێكێ دا زاخۆ شیابوو ب ئەنجامێ 71 – 67 خالان سەركەڤتنێ بنیت و دەربازبیتە فینالا خولێ كو دبیتە جارا ئێكێ د دیرۆكا خوە دا ب گەهیتە ڤێ قووناغێ، ژلایەكێ دووڤە یانەیا دیفاع ئەلجویی قارەمانا وەرزێ بۆری ژی دەربازبوو یارییا فینالێ پشتی شیایی د هەردو یاریێن خوە دا ب سەركەڤیت ل سەر یانەیا حەشد ئەلشەعبی.
