دەستپێکا خولێ دێ ئەنجامێن كەمپا ڕاهێنانێ دیارکەت
سەرکەڤت ڕەشید
وەرزێ نوو یێ خولا ستێرێن ئیراقێ یا نێزیک دبیت، هەردو نوینەرێن دەڤەرا بەهدینان دهۆك و زاخۆ بڕیارداینە قووناغا هەری گرنگ یا ئامادەكاریان ل وەلاتێ توركیا بۆ دەمێ 10 تا 15 ڕۆژان ئەنجامبدەن، د جیهانا فوتبۆلێ دا، ئەڤ دەمە نە بتنێ گەشتەكە بۆ گوهۆڕینا ژینگەهێ، بەلكو بەرێ بنیاتێ یێ هەمی وەرزییە.
ل دووڤ دیدگەها شرۆڤەكرنا هونهری، ئەڤ کەمپا ڕاهێنانێ دەرفەتەكا زێڕینە بۆ دوورئێخستنا یاریزانان ژ گڤاشتن و ئالۆزیێن ڕۆژانە، كۆمكرنا تیمێ بۆ دەمێ دو حەفتیان ل ئێك جهـ و بۆ 24 دەمژمێران، ژوورەكا جلگۆڕینێ یا ب هێز ئاڤا دكەت و هاریكاریا یاریزانێن نوو و پیشەکار دكەت كو بلەز ل گەڵ سیستەمێ یانێ و تەكتیكا ڕاهێنەری بگونجن.
بۆ وەرگێڕانا ڤێ چەندێ ل سەر ئەردێ یاریگەهێ، پێدڤییە كادرێ هونهری یێ هەردو یانەیان پڕۆگرامەكێ ڕۆژانە یێ چڕ ب كار ئینابیت كو ئەڤ خالە ب خۆڤە گرتبن:
ئاڤاكرنا بێنڤەكێشانێ ل ڕاهێنانێن سپێدێ، ئانکو دەمێ سپێدێ تەرخانكری بیت بۆ هۆلا وەرزشی (Gym) ڕاهێنانێن جەستەیی یێن زەحمەت و مەلەڤانیان، یاریزان پێدڤی ب هێز و بێهنڤەكێشانەكا باش هەیە بۆ كۆمكرنا هێزێ دا كو جەستەیێ وان بەرگریا لێدان و گڤاشتنێن درێژیا وەرزێ خولێ بگرن.
تاقیگەها تەكتیكی ل ڕاهێنانێن ئێڤاریێ، ل ڤێرە كارێ ڕاستەقینە دەست پێ دكەت. ڕاهێنانێن ئێڤاری دبنە جهێ تاقیكرنا شێوازێن نوو یێن یاریێ، ژ چەسپاندنا سیستەمێ فشاردانا بلند و ڤەگوهاستنا بلەز، هەتا كو ڕێكخستن و توندی یا هێلا بەرەڤانیێ، د نوكە دا ڕاهێنەری وستافێ وی دەمێ پێدڤی هەیە بۆ شرۆڤەكرنا فەلسەفا خۆ ب تەپێ.
نیشاندنا ڤیدیۆیی و ڕاستكرنا شاشیان، د ناڤ ڤان 15 ڕۆژان دا، وانێن تیۆری و دیتنا ڤیدیۆیێن یاریان ڕۆلەكێ ئێكلاكەر دگێڕن، ڕوونكرنا هێل، ئەرک و ئاراستەیێن یاریزانان ب ئەڤێ ڕێکێ ل سەر كاخەزێ و شاشێ، شاشیێن تاكەكەسی یێن یاریزانان كێم دكەت و ڕێكخستنا كۆمی باشتر دكەت.
تاقیكرن ب ڕێكا یاریێن دۆستانە، ئەم ئاگەهدارین كو هەر یانەیەكێ سێ یاریێن هەڤالینی ئەنجامداینە، یا ژ هەمیێ دلخۆشكەرتر، یاریا هەردو نوینەرێن بەهدینان ل گەل یانەیا ئامەدێ بوو، ئەنجامێ ڤێ یاریێ بتنێ سەركەفتن و ئێكرێزیا مالا كوردی بوو، لێ دڤێت ژبیر نەكەین كو ئەزموونا توركیا دڤێت ببیتە تاقیكرنەكا ڕاستەقینە بۆ زانینا ئاستێ تێگەهشتنا یاریزانان بۆ پلانێن تەكتیكی، ببیتە دەرگەهەك بۆ دیاركرنا پێكهاتەیێ سەرەكی و دانا دەرفەتێ ب یاریزانێن گەنج.
ل دووماهیێ، فەرە دیار كەین كو کەمپا ڕاهێنانێ یێ سەركەفتی بۆ دهۆك و زاخۆ دێ ئەو بیت یێ كو هەڤسەنگیەكا باش و دروست ل ناڤبەرا پابەندبوونا دژوار ل ڕاهێنانان و ڕێكخستنا پرۆسەیا ڤەژیان و بێهنڤەدانێ ل دەمێ نڤستن و خوارنا تەندروست پەیدا دكەت، ئەگەر ئەڤ دو حەفتییە ب دروستی هاتبنە بڕێڤەبرن، دێ هەردو یانە ب گۆپیتكا ئامادەباشیا خۆ یا هزری و جەستەیی چنە د ناڤ ڕكابەریێن خولا ستێرێن ئیراقێ دا، هەروەسا، چوار هەتا پێنچ یاریێن دەستپێكا خولێ دێ ئەنجامێن ئەڤان کەمپێن ڕاهێنانێ و ئاستێ كادرێ ڕاهێنانێ و یاریزانان بۆ هەمی حەزژێكەر و پشتەڤانێن فوتبۆلێ ل دهۆك و زاخۆ ڕوون و دیار كەن.
