رووسیا دەست ب قووناغەکا نوو ل سووریێ دکەت
وەزارەتا دەرڤە یا رۆسیا دوهی راگەهاند کو پشتی ژناڤچوونا رژێما بەشاری بۆ جارا ئێکێ و ب فەرمانا پۆتینی بالیۆزێ نوو یێ رۆسیا ل سووریێ دەست ب کارێ خوە دکەت و پۆتینی ب فەرمی دیمیتری دوگادکین وەکو بالیۆزێ نوو یێ سووریێ ئەرکدار کریە و دێ ل سووریێ وەکو بالیۆزێ نوو یێ رۆسیا دەست ب کارێ خوە کەت.
هەژی ئاماژەپێدانێ یە کو پشتی ژناڤچوونا رژێما ئەسەدی ئەڤە بۆ جارا ئێکێ یە کو رۆسیا ب فەرمی بالیۆزێ خوە ل شامێ دەستنیشان کریە و چاڤدێرێن سیاسی ژی وەسا دبینن ئەو یەک دهێتە رامانا دەستپێکەکا نوو د ناڤبەرا رۆسیا و سووریێ دا.
ل گۆر باوەریا چاڤدێرێن سیاسی رۆسیا ب چو رەنگەکێ نەڤێت دەست ژ سووریێ بەردەت و سووریێ هەردەم ژ بۆ رۆسیا یا گرنگە، ژ بەر ڤێ یەکێ ژی رۆسیا دڤێت ل گەل دەستهەلاتا نوو یا شامێ پەیوەندیێن خوە باش بکەت و وەسا بەرژەوەندیێن خوە بپارێزیت، دانانا بالیۆزەکێ نوو بۆ شامێ ژی نیشا ددەت کو رۆسیا ب هەموو رەنگەکێ کار بۆ پاراستنا بەرژەوەندیێن خوە ل سووریێ دکەت و ژناڤچوونا رژێما ئەسەدی نابیتە ئاستەنگ ل هەمبەر ستراتیژیا رۆسیا ل سووریێ.
