رەوشەنبیری د نـاڤبەرا بەرپرسیارییا گۆتارێ و گێلەشـۆكـا كـەتـواری دا
زەكـەریـا حـەمید
گۆتارا رەوشەنبیری ئێك ژ وان گۆتارێن گرنگە كو رۆلەكێ سەرەكی بۆ دروستكرنا هوشیاریێ دبینیت و ئاڤاكرنا هزرێ د جڤاكێ دا، گۆتارا رەوشەنبیری دەقەكێ دەربڕینێ نینە، بەلكو رووبەرەكێ هزری یێ ڤەكریە بۆ دانوستاندنێ و دوبارە شرۆڤەكرن و هەلوەشاندنێن گریمانەیی بۆ رۆژەڤی دكەت.
رۆلێ رەوشەنبیری ئەڤرۆ یێ چارچووڤەكری نینە ب نڤیسینا تێكستەكی یان ژ دوورڤە شرۆڤەكرنان بۆ دیاردەیان بكەت، بەلكو یێ بوویە پشكەك ژ بزاڤا رۆژانە یا جڤاكێ, د دەمێ هەر گوهۆرینەك روی بدەت، ڤێجا چ (سیاسی, ئابوری, جڤاكی، كەلتووری, رەوشەنبیری، …هتد.)بیت دڤێت نە بتنێ وەكو جاڤدێركی بیت، بەلكو ب بیتە پشكدارەكێ چالاك كو ب دەنگ و خامەیێ خۆ پشكداریێ د دروستكرنا هوشیارییا گشتی دا بكەت.
پارادۆكس ئەوە كو گەلەك جاران جڤاك رەوشەنبیران دبینن وەكی كەسێن تیۆری كو تنێ د جیهانا پەرتووكان دا دژین، كو د دەمەكی دا رەوشەنبیر كەسێ ئێكێ یە كو هەست ب دەرزێن كەتواری دكەت، چونكی ئەو ژ لایەنێ رەوشەنبیری ڤە تێدگەهن بەری كو جڤاك هەست ب ئەوان دەرزان بكەت و رەگێن ئەوان دەرزا و ئەگەران ژی دبینن، لەورا دەنگ و خامەیێ وان دبیتە پێدڤییەكا گرنگە، لێ رێ ل بەر رەوشەنبیری هەرگاڤ نە یا ڤەكریە، تایبەت د ئەڤێ گێلەشۆكا سۆشیال میدیایی و ژیانا رۆژانە دا هندەك جاران دەنگێ رەوشەنبیری د ناڤبەرا ئەوێ گیلەشۆكێ دا دهێتە گوهۆڕین و دبیتە پست پست لێ ل گەل ئەوێ چەندێ ژی دا گۆتارا وی دێ هەر مینیت, ئەگەر ئەو ژی نە ببیتە پشكەك ژ ئەوی گێلەشۆكا ناڤهاتی و ب ئەمەكداری دلسۆزی و ب بەرپرسیانە بنڤیسیت دێ شێت كاریگەریێ بكەت. هەر جڤاكەكا پشتگیرییا رەوشەنبیرێن خۆ بكەت ئەو جڤاك یا پیشكەڤتی یە و خۆ ژ دەستكاریێن دەرەكی دپارێزیت ئانكو دهێتە پاراستن و فەزایەكی بۆ دیالۆكەكا دروست ئاڤادكەت, جڤاكێ پێدڤی یا ب رەوشەنبیری هەی كو خالێن تاڕی بۆ وان رۆن بكەت و رەوشەنبیری ژی پێدڤی یا ب جڤاكێ ڤە هەیی كو گوهدارییا وی بكەت، ئان كو ب رەنگەكێ دی بێژین هەردو چین تەڤاڤكەرێن ئێكن بۆ جڤاكەكا هوشیار و پێگەهشتی، نەخاسمە بۆ ئەڤرۆیامە كو د ئەڤان كاودان و بۆیەرێن هەستیار و گوهۆڕینێن سیاسی و ئابووری و جڤاكی ل سەر ئاستێ دەولی و ئەقلیمی ژی, ل دووماهیێ پێگەهێ رەوشەنبیری یێ گرێدایە ب شیانێن ویڤە و مانەڤا وی ل جهێ دروست و گۆتارا وی یا ب ورێر و راستگۆ.
