سەعەد ئەلمشهەدانی: ب پڕانییا دەنگان بادەكا كوردستانێ باشتر بوو ژ هندستانێ و ئوردنێ
قەیس وەیس :
د داخویانیەكێ دا سەرۆكێ فدراسیۆنا تیروكۆڤانێن ئیراقێ ڕاگەهاند ب فەرمی ڕازیبوون هاتە كرن باژێرێ سلێمانیێ مێڤاندارییا كۆپا ئاسیا ل سەر ئاستێ كوڕان و كچان ل دەستپێكا چریا دویێ یا بهێت بكەت.
زێدەتر سەعەد ئەلمەشهدانی گۆت: پشتی وەرگرتنا بادەكا ئیراقێ ژلایێ فدراسیۆنا ئاسیا بۆ یارییا تیروكۆڤانی ب پلەیا زوور باش و پێشكەڤت ل سەر بادەكێن هندستانی و ئوردنی شیا ب فەرمی ڕێكخستنا مێڤاندارییا كۆپا ئاسیا وەربگریت، هەروەسان ب پڕانییا دەنگان بادەكا كوردستانێ ڕازیبوون وەرگرت ئەڤچەندە ژی دەستكەڤتەكە بۆ وەرزشا ئیراقێ ب گشتی و پێنگاڤەكا گرنگە كو ئەڤ یارییە باشتر پێشكەڤیت، ئەم سۆپاسییا بەرپرسێن هەرێمێ و ئیراقێ دكەین بۆ هەڤكارییا وان.
هەروەسان ناڤهاتی گۆت: وەرگرتنا ڕازیبوونێ یا ب سانەهی نەبوو بەرانبەر دو وەلاتێن پێشكەڤتی د ڤێ یاریێ دا، لێ ژبەركو بادەكا ئیراقێ كو باژێرەكێ هەرێمێ مێڤانداریێ بكەت ب ژێرخانەیا خوە یا وەرزشی پێشكەڤتی یە و هەبوونا خالێن سەركەڤتنا قارەمانیێ ژی تێدا هەنە، لەوما ژی ب ڕێژەیا باش ڕازیبوون هاتە وەرگرتن، دەمێ بهێت دا دێ كۆمبوونێن بەرفرەه، هەبن ژوانا دانانا لژنەیێن كاری هەروەسان یێن ڕێكخستنێ، هەردەمێ مە باژێرەكێ كوردستان بۆ قارەمانیەكا نێڤدەولەتی بەربژاركری ب مسۆگەر هاتیە وەرگرتن و ڕازیبوون ل سەر هاتیە كرن.
ژلایەكێ دووڤە سەعەد ئەلمشهەدانی ئەوچەندە گۆت ژی: مە یاریزانێن گەلەك باش هەنە ل سەر ئاستێ كوڕان و كچان، پێشبینی دكەم دێ هەڤڕكێن باش بن بۆ ڕێزێن ئێكێ، سەرئەنجامێن دووماهی پشكدارییا وان ل بەنگلادشێ ڕێزێن ئێكێ و دویێ د ئاستێن جودا هەبوون.
بۆ زانین وەزارەتا وەرزش و لاوێن ئیراقێ ب نڤێسارەكا فەرمی ڕاگەهاندییە بۆ مێڤاندارییا هەر قارەمانیەكا نێڤدەولەتی ل ئیراقێ، ئەوان هەرسێ پارێزگەهێن دهۆك، هەولێر و سلێمانیێ ژ هەرێما كوردستانێ دەستنیشانكرینە، ژبەر هەبوونا ژێرخانەیا وەرزشی یا مۆدرێن و خالێن سەركەفتنا هەر قارەمانیەكێ و ئەو دێ پشتەڤانییا هەر مێڤاندارییەكێ ل كوردستانێ كەن.
