فەهمی فازل: ب یاریزانێن ناڤخۆ دێ شەڕی بۆ سەركەفتنێ و دەربازبوونێ كەین
رەمەزان زەكەریا
د داخۆیانیەكێ دا پەیڤدارێ یانەیا بجیل یا وەرزشی ئاشكرا كر تیما وان یا فوتبۆلێ بەردەوامە ل سەر ڕاهێنانێن خوە یێن رۆژانە ژبۆ گەهشت ب گۆپیتكا بەرهەڤیێن خوە بۆ وەرزێ نوو یێ خولا پلە دو، ئەو پێنج یانەیێن پارێزگەهێ دناڤا خولێ دا پشكدارن ئەو ژی، باتیفا، پیرس، بجێل، شێلادزێ و دینارتە و دیار كر پێنگاڤێن خۆ بەر ب ڕێكخستنەكا باش هاڤێتینە دا كو ب ئاستەكێ باشتر ژ وەرزێن بۆری و دلخوەشكرنا جەماوەرێ خوە بكەن.
زێدەتر فەهمی فازل بۆ ئەڤرۆ گۆت: بەری دەستپێكرنا خولی هەر یانەیەك ب هیلإی و ئارمانجێ جودا هەنە بۆ وەرزێ نوو، لێ هەموو یانە حەز دكەن ب سەركەڤن و ئەڤە ژی مافێ هەر یانەیەكێ یە، لەوما ژی وەكو یانەیا بجێل دەستەیا كارگێڕی ب هەماهەنگی ل گەل كادرێ ڕاهێنەران ب هشیاری بڕیارێ ل سەر شیانێن پێكهاتەیێ ددەن، ئەم ب شێوازەكێ زۆر باش و ب تێڕوانینەكا كوالیتی ئامادەكاریان دكەین.
ناڤبری گۆتژی: ب هووربینی بەرێ خۆ ددەینە شیانێن یاریزانان و تەمامكرنا كێماسیێن وان هەتا نوكە مە شیایە دو یاریزانێن نوو بینە د ناڤ ڕێزێن پێكهاتەیا خۆ دا، بەلێ ئستراتیجیەتا مە ئەڤەیە كو زۆربەیا گرنگیدان و پشتبەستنا مە دێ ل سەر شیان و یاریزانێن ناڤخۆیی بیت دا كو گرنگیێ ب بەهرەیێن دەڤەرێ بدەین.»
ناڤهاتی گۆت: بۆ گرنگیدان ب یاریزانان پەیاما مە بۆ ڤی وەرزی ڕوونە ئەگەر پشتەڤانیا خودێ مە بهێتە كرن مە ل بەرە ب هەموو هێزا خۆ شەڕێ سەركەفتنێ ب كەین و یانەیێ بگەهینینە ئاستێن بلندتر چونكی جەماوەرێ دەڤەرێ هەژی دیتنا ئەنجامێن مەزنن.
ل دووماهیێ فەهمی فازل: ئاستەنگا هەرە مەزن و كاریگەر كو تووشی مە دبیت نەبوونا یاریگەهەكا تەمامكریە د سنورێ مە دا. پرۆژەیێ ئاڤاكرنا یاریگەها مە هەتا نوكە ب دووماهی نەهاتییە و ئەڤە ژی فشارەكا مەزنا دەروونی و دارایی ل سەر یانەیێ دروست دكەت، چونكی ناچارین بۆ ڕاهێنان و هەڤڕكیان پشتبەستنێ ل سەر جهێن دی ب كەین.
بۆ زانین وەرزێ نوو یا خولا دو یا كوردستانێ بڕیارە ل 20ێ ڤێ مەهێ بهێتە كرن ئەوا 24 یانە پشكدارن و هاتینە بەلاڤكرن ل سەر پێنج كۆمان، یاریێن وان ب شێوەیێ خول ئێك قووناغ دێ هێنە كرن.
