قانوونه‌ك بۆ زانكۆ و په‌یمانگه‌هێن ئه‌هلی دێ هێته ده‌ركرن
هه‌ولێر، قائید میرۆ:
پڕۆژه‌قانوونه‌ك ل دۆر زانكۆ و په‌یمانگه‌هێن ئه‌هلی هاتیه به‌رهه‌ڤكرن و بڕیاره خواندنا دویێ بۆ بهێته كرن و بڕیارده‌را لیژنا په‌روه‌ردێ و خواندنا بلند ژی ل په‌رله‌مانێ كوردستانێ دبێژیت: پشتی په‌سه‌ندكرنێ دێ كاریگه‌ری ل سه‌ر رێكخستنا زانكۆ و په‌یمانگه‌هێن ئه‌هلی هه‌بیت.
دكتۆره گه‌لاوێژ عوبێد، بڕیارده‌را لیژنا په‌روه‌ردێ و خواندنا بلند ل په‌رله‌مانێ كوردستانێ بۆ رۆژناما ئه‌ڤرۆ دیار كر، پڕۆژه‌قانوونه‌ك ل دۆر زانكۆ و په‌یمانگه‌هێن ئه‌هلی هاتیه به‌رهه‌ڤكرن و گۆت: “حه‌فتیا بۆری لیژنا په‌روه‌ردێ و خواندنا بلند ل دۆر پڕۆژه‌قانوونێ كۆمبوویه، پڕۆژه‌قانوون ل سالا 2020ێ خواندنا ئێكێ بۆ هاتیه كرن، مه‌ره‌م ژ ده‌ركرنا قانوونێ پێشڤه‌برن و رێكخستنا زانكۆ و په‌یمانگه‌هێن ئه‌هلی و تایبه‌ته ل هه‌رێما كوردستانێ”.
دكتۆره گه‌لاوێژ عوبێد گۆتژی: “لیژنا په‌روه‌ردێ و خواندنا بلند پێشنیارێن خوه ئاشكراكرینه و بڕیاره لیژنه راپۆرته‌كێ ل دۆر پڕۆژه‌قانوونا زانكۆ و په‌یمانگه‌هێن ئه‌هلی به‌رهه‌ڤ بكه‌ت و ئاراسته‌ی سه‌رۆكایه‌تیا په‌رله‌مانی بكه‌ت، هه‌تا پڕۆژه‌قانوون بكه‌ڤیته د ناڤا كارناما كۆمبوونێن په‌رله‌مانی دا و خواندنا دویێ بۆ بهێته كرن، كو پشتی په‌سه‌ندكرنێ دێ كاریگه‌ری ل سه‌ر رێكخستنا زانكۆ و په‌یمانگه‌هێن ئه‌هلی هه‌بیت”.
