كەتوارێ هەلوەستان
سالح حەكیم
ژیان ب خۆشی و نەهامەتێن خۆڤە پشكەكن ژ كەتۆارێ مرۆڤ تێدا دژیت و بەرتەنگی و بەرفرەهی ئەزموونێن ب رێڤەبرنا ژیانا هەر تاكەكێ د جڤاكی دا سەر ڕوویێ هەسارێ بژیت هەر ئێك وەكو دیتنا خۆ دسەلمینیت د پرۆسسا ژیانێ دا ئانكۆ ل دووڤ شارەزایی و هشیاریا تێگەهشتنا خۆ كا دێ چاوان شێت یێ سەركەفتی بیت پێ نە ڤێت هندەك جاران هندەك كاودانێن ژیانێ بێ ئیرادەیا تە دهێن تە بڤێت و نەڤێت دێ بنە ژیوار تو نەچاری خوە دگەل بگونچینی ئانكو بێ ئیرادەیا مرۆڤی كێشە دروست دبن، پتریا هەلوەستان دهێنە وەرگرتن دا ئاریشەیێن جڤاكی پێ چارەسەر بكەین
نە بەرۆڤاژی بەرەف دۆخەكێ مەزنترڤە ببەین، لێ دێ بینی پتریا جاران ئەو كاودانێن بەرتەنگ ئەوێن د ژیانا مرۆڤی دا سەرهلددەن هینگێ هێزا تە هاری تە ناكەت هەكە تە ل پێش دەم كار سەر نەكربیت، پرۆژە بۆ دانابن ئانكو بەری هەر گۆتنەكێ بەرهەڤی بۆ دڤێن، داكو وەكو پێدڤی بشێن دەربرینێ ژ هەلوەست و ژیوارێ تێدا هەی بكەین و جاران ژی كاودان ژ نشكەكێ ڤە و ب لەزاتیا دەمی هەلوەست لاواز دەردكەڤن، ئەو كارڤەدان دێ بنە فاكتەرێ تووشبوونا ئاریشەیێن دەروونی ژی بۆ مرۆڤی، ژ وێ بڕیار و هەلوەستی بەرتەنگێ تە دایێ دێ پرسگریك پەیدابن نەخاسمە هەكە مرۆڤ هەست ب شاشیا خۆكر، لێ مە گۆتن گەلەك جاران ژ نشكەكێ ڤە هەلوەستێن هۆسا دهێنە وەرگرتن، تایبەتی دەمێ كاودانەكێ نەخوازیار دهێنە پێش، لەزاتی و تورەیی دبنە سەدەمێ دلتەنگیێ د پەیداكرنا ئاریشەیێن جڤاكی دا، دانا هەلوەستی، یان وەرگرتنا هەلوەستێ ژ رەفتار و سلۆگانێن مرۆڤی دیار دبن، مە بڤێت نەڤێت دێ دەربڕینێ ژ هەلوەستێ خۆ كەین، بدیتنا من و گەلەك فەرە ژی هەلوەست هینگێ بهێنە وەرگرتن، دەمێ مرۆڤ هەموو ڕەهەندێن كاری و بكەرێ كاری دخوینیت و ئەگەرێ وەرگرتنا هەلوەستەكێ زوو و ل هەمبەری وان پێرابوونان كارڤەدانێن نەخوزراو دهێن.
