مه‌سرور بارزانی پێشوازیێ ل كونسۆلێ گشتیێ بریتانیا ل هه‌رێمێ دكه‌ت

مه‌سرور بارزانی پێشوازیێ ل كونسۆلێ گشتیێ بریتانیا ل هه‌رێمێ دكه‌ت

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی ئێكشه‌مبی 4/12/2022 پێشوازی ل (ده‌یڤێد هانت) كونسۆلێ گشتیێ بریتانیا ل هه‌رێما كوردستانێ كر كو ب مه‌به‌ستا ب دووماهی هاتنا ئه‌ركێ وی سه‌ره‌دان كربوو.

سه‌رۆكێ حوكمه‌تا هه‌رێما كوردستانێ سوپاسیا كونسۆلێ گشتیێ بریتانیا كر كو د ده‌مێ كاركرنا وی دا، كار بۆ به‌ر ب پێشڤه‌برن و بهێزكرنا په‌یوه‌ندیان د ناڤبه‌را هه‌رێما كوردستانێ و بریتانیا كریه‌ و هیڤیا سه‌ركه‌فتنێ د ئه‌ركێ داهاتی دا بۆ خواست.

كونسۆلێ گشتیێ بریتانیا، ئاماژه‌ ب په‌یوه‌ندیێن بهێز دناڤبه‌را وه‌لاتێ وی و هه‌رێما كوردستانێ كر، ب تایبه‌تی پشتی سه‌ره‌دانا سه‌رۆكێ حوكمه‌تا هه‌رێمێ بۆ بریتانیا ل هه‌یڤا نیسانا بۆری، كو بۆ وه‌رچه‌رخانه‌ك د پێشڤه‌چوونا په‌یوه‌ندیێن د ناڤبه‌را هه‌ردو ئالیان دا.

كونسۆلێ گشتیێ بریتانیا هه‌روه‌سا سوپاسی و پێزانینا خوه‌ بۆ كارئاسانی و هه‌ماهه‌نگیكرنا ئالیێن په‌یوه‌ندیدارێن حوكمه‌تا هه‌رێما كوردستانێ ل گه‌ل كونسۆلخانه‌یا وه‌لاتێ خوه‌ ده‌ربری.

چاكسازیێن كابینه‌یا نه‌هێ و گرنگیا چاره‌سه‌ركرنا كێشه‌یێن هه‌رێما كوردستانێ و حوكمه‌تا فیدرالی و پاراستنا ئاسایش و سه‌قامگیری و سه‌روه‌ریا ئیراقێ و هه‌رێما كوردستانێ، چه‌ند ته‌وه‌ره‌كێن دی یێن دانوستاندنێن دیدارێ بوون.

کۆمێنتا تە