مێژوویـا خـەبـاتـێ و ستوونـا ڕزگـاریێ
هـەدار نێروەیـی
دامەزراندنا پارتی دیموكراتی كوردستان ل ١٦ی تەباخا سالا ١٩٤٦ێ، نە بتنێ بەلگەیەكێ سادە یێ سیاسی بوو د مەیدانا خەباتێ دا، بەلكو وەرچەرخانەكا مەزن، دەستپێكەكا نوی و چارەنڤێساز بوو د هەمی مێژوویا گەلێ كورد دا. ل وی سەردەمێ كو بێهیڤیبوون و بێ ئومێدیێ بالێ خۆ كێشابوو سەر تەڤایا ناڤچە و بزاڤێن ڕزگاریخوازی یێن كوردایەتیێ و تووشی پاشڤەچوون و شكەستنێن مەزن ببوون، دامەزراندنا ڤێ پارتێ هیڤییەكا نوی و ئیرادەیەكا ب هێز د ناڤ روحا هەمی مللەتی دا ئافراندەڤە. ڤی هەلوەستی گرنتی دا، كو دۆزا ڕەوا و پیرۆزا كوردان چ جاران ناچیتە د ناڤ لاپەڕێن ژبیركرن و بەرزەبوونێ دا، بەلكو دێ ب ڕێكخستیتر و ب هێزتر ل سەر ئاستێ هەرێمی و نیڤدەولەتی هێتە دیاركرن و بەحسكرن.
د ڤێ مێژوویا پڕ ژ سەر بلندی دا، ڕۆلێ ڕابەرێ نەتەوەیی و ڕوحی، بارزانیێ نەمر (مەلا مستەفا بارزانی)، بەرهەمدارترین، مەزنترین و بریسقەدارترین ستوینا ڤی كاروانێ پیرۆز بوو. بارزانیێ نەمر ژ بلی سەركردەیەكێ سیاسی و سەربازی بوو، ببوو سیمبۆلێ ئیرادە و خۆڕاگریێ و سەربەرزی و ناسنامەیا نەتەوەییا هەمی كوردان د سەردەمەكێ سەخت دا. وی ب ئاقلمەندی، ئەزموون و كێشانا ڕێبازەكا پیرۆز، شیا ئێكخستنێ د ڕێزێن گەلێ كورد دا پەیدا بكەت، و هشیارییا نەتەوەیی بلند بكەت. بارزانی ب كریار و ب خەباتا خۆ سەلماند كو مافێ كوردان ب هیڤی و رجایا و لاوازیێ ب دەست ڤە نائیت، بەلكو ب خەبات، مێرخاسی، قوربانیدان و وەفاداریێ دێ ئێتە وەرگرتن.
شۆرشێن ب ناڤودەنگ و مێژوویی یێن وەكی شۆرشا ئیلۆنا مەزن و پاشی شۆرشا گولانا پێشكەفتنخواز، مەزنترین نموونەیا بەرگریكرن و خۆڕاگریێ بوون ژ ئاخ، ڕامان، ئازادی و كەرامەتا كوردستانێ. ڤان شۆرشان نیشا جیهانێ هەمیێ دا، كو گەلێ كورد ئامادەیە گرانترین باج، قوربانی و خوینێ بدەت، بەس ئامادە نینە ل بن دەستێ دوژمن و زۆرداران دا بژیت. پێشمەرگەیێن قارەمان ب ڕێبەراتیا راستەوخۆ یا بارزانیێ نەمر، ل سەر چیایێن بلند و سۆزدارێن كوردستانێ پەیمانا وەفادایێ دا و وەلات ژ هێرشێن داگیركەران پاراست. هەمی دەستكەفتێن ئازادیێ، قەوارەیێ هەرێمێ و ئەڤ سەرفەرازیا ئەڤرۆ مە ل كوردستانێ هەی، بەرهەمێ وێ خوین، مۆڕال و ئارەقا خەباتكارێن وان شۆرشانە.
گرنگیا مێژوویی یا دامەزراندنا پارتی د وێ دەستكەفتا مەزن دا كورت دبیت، كو شیا كیان و ناسنامەیا كوردستانێ بپارێزیت و هزرا ئازادیخوازیێ د ناڤ ناخێ هەمی نەڤیێن كورد دا بچینیت. ڤێ ڕێبازێ نیشا تەڤایا جیهانێ دا، كو كورد نەتەوەیەكێ زیندیە، خۆدان كەلتوور و مێژووە و چ جاران تەسلیمبوون و بندەستیێ قەبویل ناكەن.
ئەڤرۆ ژی، وەكی وەفاداریەك بۆ خوینا پاقژ یا شەهیدان و ڕێبازا پیرۆزا بارزانیێ نەمر، ئەركێ مە هەمیانە، كو ڤێ مێژوویا پڕ ژ سەربەرزی بپارێزین. ژبەر كو پارتی نە بتنێ دیرۆكەكا بۆری یە، بەلكۆ ستوینا ئارامیێ، پاراستنا كیانێ هەرێمێ یە و هیڤیا سوبەیەكا گەشترە بۆ گەلێ كوردستانێ.
