هەلوەستێ بەغدا ل سەر چەكێ پێشمەرگەی
هەلگر دێوالی محەمەد تاهر
ل ڤێ قووناغا هەستیار و پڕ گوهۆڕین، هەرێما كوردستانێ پێدڤی ب قەلغانەكا قایم بۆ پاراستنا قەوارە و دەستكەفتێن خۆ هەیە، ل ڤێرێ هێزا پێشمەرگەی وەكو كۆڵكەیا سەرەكی و پارێزەرێ بێگۆمان یێ ئارامیا دەڤەرێ دەركەتیە پێش. پێشمەرگە تنێ هێزەكا لەشكری نینە، بەلكو قەوارە و رۆمەتا نەتەوەیەكی یە كو ژ سەد سالان ڤە د ڕێیا پاراستنا خاك و خەلكێ خۆ دا قوربانیێن مەزن دایە. د حالەتێ نوكە دا، هەر ژ بەر ئارامی و سەقامگیریا كو ل هەرێمێ هەی، ڕۆلێ پێشمەرگەی د ڕووبەڕووبوونا مەترسیێن تیرۆرێ و پاراستنا پێكڤەژیانێ دا ڕۆلەكێ بێوێنە و كاریگەرە و نەهێلایە چ ڤالاڤاییەكا ئەولەهی ل ناڤچەیێن جێ ناكۆك و سنووران دروست ببیت.
ل ئالییەكێ دی ڤە، هەلوەست و گۆتۆبێژێن هندەك دەستهەلاتدار و ئالیێن سیاسی یێن بەغدا ل سەر پرسا چەكێ پێشمەرگەی بوویە مایە نێرینێن جۆراوجۆر و بەحسكرنا دانا چەكێ وێ. بەغدا ل هندەك دەمان داخوازییا دانا چەكێ پێشمەرگەی یان تێكەلكرنا وێ ب شێوەیەكێ بێ مەرج و ژێر فشارێن ناڤەندی دكەت، لێ ئەڤە ب توندی دهێتە ڕەتكرن ژ دەستدانا چەكی ب خوە رامانا ژ دەستدانا رۆمەت و قورساییەكا مەزنا سیاسی و ئەولەهی یە؛ چنكو پێشمەرگە ب دەه سالان قەلغانا پاراستنا شكۆیا مللەتێ كورد بوویە و هەر هەولەك بۆ چەكدانان یان بێمەرج مژویلكرنا وێ، دێ كەڤنە ناڤ مەترسیا ژناڤبرنا قەوارەیا دەستووری و لێوازكرنا پێگەهێ سیاسی یێ هەرێما كوردستانێ ل ناڤبەرا ئیراقێ و دەڤەرێ دا.
پێشمەرگە هێزەكە بنەمایێ وێ د ناڤ دەستوورێ ئیراقا فیدرال دا هاتیە چەسپاندن و پشكەكە ژ مەنزۆمەیا بەرگرییا ئیراقێ، نە كو هێزەك ل دەرڤەی قانوونێ. هەر هەولەك یان فشارەك بۆ لاوازكرن یان دانا چەكێ پێشمەرگەی، رامانا وێ ڤەكرنا دەرگەهی یە بۆ ژناڤبرنا قەوارەیا دەستوورێ هەرێمێ و زڤڕاندنا مەترسیێن تیرۆرێ بۆ سەر سەرجەمێ ناڤچەیێ. ژ بەر ڤێ چەندێ، تاكە ڕێیا دروست و ئاڤاكەر بۆ چارەسەركرنا هەر ئاریشەیەكێ، دانوستاندن و هەماهەنگی یە ل سەر بنەمایێ دەستووری و ڕێزگرتنێ، نە كو بڕیارێن تاكلایەنە و فشارێن سیاسی.
