پیرس عەلی ئێكانە یاریزانێ كوردستانییە دێ پشكداریێ د قارەمانییا ئاسیا دا كەت
ب شێوەیەكێ فەرمی پیرس عەلی حەسەن ئێكانە یاریزانێ كوردستانی و پارێزگەهێ دێ پشكداریێ د قارەمانییا ئاسیا یا تێنسا ل سەر مێزێ ب ناڤێ هەلبژارتیێ ئیراقێ كەت، ئەوا بڕیارە هەڤڕكیێن وێ ل 11ێ مەها بهێت پایتەختێ ئوردن عەمان مێڤانداریا وێ بكەت، پشتی شیایی د ڤاڤارتنێن تایبەت بۆ هەلبژارتیێ ئیراقێ ل باژێرێ سلێمانیێ هاتینە كرن.
ل دۆر ڤێ یەكێ یاریزانێ ناڤهاتی تایبەت بۆ رۆژنامەیا ئەڤرۆ گۆت: خوە بەرهەڤكرن بۆ قارەمانییا ئاسیا فدراسیۆنا تێنسا ل سەر مێزێ ڤاڤارتن بۆ 12 باشترین یاریزانان ل سەر ئاستێ پێشكەڤتیان ل باژێرێ سلێمانیێ دانا ئەوا بۆ ماوەیێ چار رۆژان یا بەردەوام بوو، ئەز وەكو تاكە یاریزانێ پارێزگەهێ دگەل چەند یاریزانێن دی یێن هەولێر، سلێمانی و باژێرێن دی یێن ئیراقێ پشكداربووین، پشتی هەڤڕكییەكا دژوار ب سۆپاسی ڤە شیام جهێ خوە دناڤ ڕێزێن هەلبژارتیێ ئیراقێ پارێزم و پلێتا پشكداریێ د قارەمانییا ئاسیا دا بكەم ئەوا دێ ل 11ێ مەها بهێت ل ئوردن هێتە كرن.
هەروەسان پیرس عەلی گۆت: ئەز ئێكانە كوڕێ پارێزگەهێ و كوردستانی دگەل سێ هەڤالێن خوە دێ پشكداریێ دقارەمانیی دا كەین، گەلەك كەیفخوەشم كو شیایم ب هاریكارییا ڕاهێنەرێ خوە بەشار ڕەمەزان بەردەوامیێ بدەمە مانا خوە دگەل هەلبژارتیێ ئیراقێ و پشكداریێ د قارەمانییا ئاسیا دابكەم، پێنەڤێت ئەڤ دەستكەڤتە ژی ب سانەهی نەبوویە بەلكو زەحمەتەكا درێژ و ڕاهێنانێن بەردەوام بوویە، بۆ داهاتی بەرهەڤیێن باشتر هەبن و هەموو بزاڤان بكەم پشكدارییەكا سەرفەراز د قارەمانییا ئاسیا دا بدەستڤە بینم.
هەژی گۆتنێ یە دگەل یاریزانێ كوردستانی پیرس عەلی هەر ئێك ژ غەیز فازل، ئەنەور موئەید و محەمەد زیاد دێ نوونەراتییا ئیراقێ د قارەمانییا ئاسیایێ دا كەن.
