پێشمەرگـە چیایـێ خـۆڕاگـر و كـەلها پاراستنا ناسنامە و ئـاخـا كوردستانـێ یە
نایف مەحموود
پێشمەرگە ئەو ڕۆمەتە، ئەو ناڤ و ناسناڤێ پیرۆز و گرانە یێ كوردستان شانازیەكا مەزن پێ دبەت، لەوما د دیرۆكا گەلان دا هندەك ناڤ و چەمك هەنە كو ژ پەیڤەكا ئاسایی دەرباز دبن و دبنە سیمبۆلێن نەتەوەیی، دبنە هێما و تاج و سەروەری. بۆ گەلێ كورد ژی پەیڤا «پێشمەرگە» نە بتنێ ناڤێ چەكدارەكی یە، بەلكو پێناسەیا مانونەمانێ یە، ئیرادەكا پیلایی یە كو د چاڤێن چیا و گۆتنێن سەربلندیێ دا دهێتە خواندن و بوویە ئەو چیایێ خۆڕاگری و بەرخوەدانێ یێ كو د سەخترین و تاریترین قووناغێن مێژوویێ دا، سینگێ خۆ كریە قەلغان بۆ پاراستنا خاك و كەرامەتا مللەتێ خۆ و چ جاران ژی سەرێ خۆ بۆ دوژمن و داگیركەران نەچەماندیە. كوردستان ژ مێژ وەرە ب سروشتێ خۆ یێ چیایی هاتیە نیاسین، بەلێ چیا د مێژوویا مە دا نە بتنێ بەربەستێن سروشتی بووینە، بەلكو وەك پشت و پەنا بووینە بۆ شۆڕشگێڕان. دەمێ پێشمەرگەی پێ یێن خۆ د ناڤ دۆڵ و چیا و وان رۆژگارێن سەخت دا د دنان، هینگێ وی خۆ دكرە پشكەك ژ وی سروشتێ سەربلند، وەك چاوا چیا ل هەنبەر با و بارۆڤان ڕادوەستن و نالەرزن و نا لڤن، پێشمەرگە ژی ب هەمان شێوە ل هەنبەر هێزێن داگیركەر و تۆپباران و كیمیابارانان بوو چیایەكێ نەهێتە هەژاندن. دەمێ دوژمن ژبەر حنێر و پەهلەوانیا پێشمەرگەی ڤەدجنقی و لەرزك دكەتە ناخ و دلێ وان، نەكو ژ بەر چەكی و ئامرازێن شەڕی بوو، بەلكو ژ ئەنجامێ وێ باوەرییا دلسۆزانە بوو كو د سینگێ هەر پێشمەرگەیەكێ دا هەبوو، ژبەر وێ باوەریێ بوو یا ب دۆزا ڕەوا یا گەلێ خۆ هەی، دیسان باوەری ب ئازادی و سەرفەرازیێ. حەتاكو پێشمەرگە بوویە ناڤ و دەنگیەكا جیهانی و ژ چارچووڤەیێ سنوورێ وەلاتەكی دەربازبووی ئەوبوو ل سەردەمێ سەرهلدانا ڕێكخراوا تیرۆرستی یا داعش ئەفسانەیا وێ تێكشكاند و دیرۆكەك ژ ئازایەتی و قارەمانیێ تۆمار كر و بەڕەڤانی ژ ئاخ و كەرامەتا كورد و كوردستانێ كر. وەختێ هەر مەترسیەكا دكەڤیتە سەر ئاخا كوردستانێ، پێشمەرگەی بێ دودلی و ب باوەریەكا مەزن ڤە ڕوی ب ڕوی دوژمنان دبیت سینگێ خۆ دكەتە قەلغان بۆ پاراستنا خاك و ئالا و نامووسا وەلاتی. ژ وان شۆڕش و داستانێن دژی ڕژێمێن دیكتاتۆر یێن گۆڕبگۆڕ، پێشمەرگەی سەلماندیە كو ئەو تاكە هێزە دشێت ئەفسانەیا تاریاتیێ تێكبشكێنیت و دوژمنی نەچار بكەت چۆكان بۆ پێشمەرگەی دانیت و خۆ ل تێلێن وی ئاگری نەدەت. هەلبەت ئەو قوربانیدانا پێشمەرگە ددەت، ژ پێخەمەت كورسی و دەسەڵاتێ نینە، بەلكو بۆ هندێ بوویە دا كو ئالایێ كوردستانێ ب سەربلندی بمینیت و نفشێ داهاتی د ناڤ ئاشتی و تەناهیێ دا بژین، ژبەر ڤێ ئێكێ ژی هەژیە بێژین هەر دلۆپەكا خوینا شەهیدەكێ پێشمەرگە دبیتە ڕۆناهیەك بۆ پاشەڕۆژەكا گەشتر، دبیتە نێرگزەك بۆ بۆهارەكا ب خەملتر. بێگۆمان مێژوویا تەڤگەرا ڕزگاریخوازا كوردستانێ یا تژی یە ژ وان شەڕ و شۆڕش و داستانێن كو پێشمەرگەی تێدا مەرگ هەڵبژارتیە و خۆ ڕادەستكرن د فەرهنگا پێشمەرگەی دا خەونا حێشتران بوویە و هەردەم ل ژێر درووشمێ «یان كوردستان یان نەمان» چەپەرێ دوژمنی شكاندیە، ب ئیرادە و باوەری سەركەفتن ل دویڤ سەركەفتنێ ب مزگینی ڤە پێشكێشی گەلێ خۆ كریە. دیسا ئاماژە و خالەكا دی یا جەوهەری بدەینە خۆیاكرن ئەوژی ژ وان وێستگەهــ و ووناغێن شەڕ و ئاگرێ ل سەر كوردان د باری دەمێ پێشمەرگە د زیندانێن تاری یێن دوژمنان دا، د بن ئەشكەنجەیێن توند دا، و ل بەر بەندكێ سێدارێ، جیهان فێر كر كا چاوا مرۆڤ دشێت ب جەستە بهێتە بێهێزكرن، بەلكو ئیرادە و بیروباوەر ناهێنە شكاندن و نامرن. ئەڤ ڕەفتار و سەربۆڕێن بووینە دیرۆك و ناسنامەیا پیرۆزا پێشمەرگەی د هەمان دەم دا قوتابخانەكە كو تێدا فێری ڕێزگرتن ل بەهایێن ئازادیێ دبین و بۆ خەبات و تێكۆشانێ نە ڕاوەستین، ژبەركو ڕێزگرتن ل ڤێ خەباتێ و وەفاداریێ و ڕێبازا وان یا پیرۆز، ب پاراستنا دەستكەفتێن نەتەوەیی و ئێكڕێزیێ دبن. ڤێجا گەلو كەنگی یا ڕەوا و بەرئاقلە كو پێشمەرگە خۆدانێ ڤێ ڕاستیێ و شانازیێ بیت ئەڤرۆ هندەكا ئەو بێوژدانیە هەبیت بێژن دڤێت پێشمەرگە بهێتە ژ چەككرن و تەڤلی ناڤ سۆپایێ ئیراقێ ببیت! ئەو دەما ئەڤ پێشمەرگە ژ برین و ڕۆندكێن نەتەوەیەكی ژ دایك بووی بەرامبەر زۆلم و ستەما داگیركەران و بوویە هێزەكا نیشتمانی و نیزامی و دەستووری، ئەرێ بۆچی د نها دا و پشتی ژ چەكدانانا هندەك ژ میلیشیاتێن ئیراقێ دەنگ و باسێ پێشمەرگەی ژی ل سە زارێ هندەك نەحەزان بوویە بابەتێ ڕۆژەڤێ؟ ئەڤە ب خۆ ئەگەر پیلان بیت واتە پیلانەكا سەرنەگرتیە و دێ ئەڤ خەونا نەحەزان چیتە گوڕی و پێشمەرگە دێ هەر مینیت ناڤ و ناسنامە و شانازیا گەلێ كورد و چەقێ ناڤ چاڤێن دوژمنی.
