ڕێككەفتنامەیا (مەكـەهـ)ێ د ناڤبەرا سەركەڤتن و شكەستنێ دا
رێمان ئیسماعیل زێباری
ل دویڤ بۆچوونا پرانیا شڕوۆڤەكار و شاڕەزایێن سیاسی دا ئەڤ ڕێككەفتنامە یا دەم كوڕتە و تەمەنێ وێ دڕێژنابیت و ل دویڤ بۆچوونا تایبەت، من ژی هەمان بۆچوون هەیە، ئەو ژی ژبەر چەندین ئەگەر و رویدانێن مێژووی د ناڤبەرا هەر سێ وەلاتێن ئەندام (توركیا، عەرەبستانا سعوودی، پاكستان) و جوداهیا ئایدولۆژیا ڤان وەلاتان كو دێ د چەند خالان دا شڕۆڤەكەم :
١- ناكۆكیێن ناڤەكی و مێژووی: توركیا و عەرەبستانا سعوودیێ ل سالێن بۆری دا ل سەر چەندین پرسێن وەكی (ئیخوان، قەتەر، دەست تێوەردانێن سووریا و لیبیا)، رویبری ئێك بووینە و باوەریا د ناڤبەرا وان دا یا لاوازە و ڕێككەفتنەكا كاغەزی نەشێت هەمی ئەوان دوبەرەكیان ئێكسەر ژێ ببەت.
٢- پەیوەندیێن جیاواز ل گەل ئیرانێ: توركیا پەیوەندیێن بازڕگانی و دیپلۆماسی یێن باش ل گەل ئیرانی هەنە، بەلێ سعوودیێ د قەیرانێن كویر یێن هزری و مەزهەبی دایە ل گەل ئیرانێ و پاكستانێ پەیوەندیێن وێ ل گەل هەر ئێك ژ سعوودیێ و ئیرانێ و توركیا د باش و سنووردارن، ئەڤ جیاوازیە دشێت د دەمێن قەیرانان دا ببیتە ئاریشە.
٣- ئاریشا پاكستان – هندستان: پاكستان خۆدانا چەكێ ئەتۆمییە و دوژمنا سەرەكییا هندستانێ یە، هەر ئێك ژ سعوودیا و توركیا نەڤێن بچنە د ناڤ ململانێیەكا ئەتۆمی دا، پشكداریا پاكستانێ د ڤێ رێكەڤتنێ دا گەلەك ئالۆزتر دكەت، چنكو ئەڤ چەندە ڤێ رێكەفتنێ دكەتە تشتەكێ زێدەتر ژ هەڤپەیمانیەكا ئاسای د دەڤەرێ دا.
٤- پەیمانا بەڕەڤانیا ناتۆیێ بهێزترە: توركیا ئەنداما ناتۆیێ یە ئەگەر ل دەمێ هەر هێرشەكێ دا ناتۆ (ب سەركردایەتیا ئەمریكا) ب لەزتر و ب هێزتر كارڤەدان دێ هەبیت ژ ڤێ هاڤپەیمانیا نوی، ژبەر هندێ توركیا چ دەمان ڤێ رێكەفتنێ ل پێش ناتۆیێ دانانیت و ئەگەر هات و ئێك ژ ڤان وەلاتێن ئەندام ل گەل وەلاتەكێ ئەنداما ناتۆیێ كەڤتە د شەڕی دا توكیا دێ كێ هەلبژێریت؟.
٥- گەشبینی ڕاستەوخۆ ژناڤ دچیت: ب تنێ د چەند رۆژان دا پشتی ئیمزاكرنێ عەرەبستانا سعوودیێ ب شەڕێ ئاخفتنێ دگەل ئیرانێ زڤریە سەر شێوازێ خۆ یێ كەڤن و هەڕەشێ ل ئیرانێ كرن، ئەڤە ژی نیشانا وێ چەندێ یە كو رێكەفتنێ نەشیایە باوەریا راستەقینە دروست بكەت.
٦- دەم كورتی و هەبوونا شوینگریێ: زۆر ژ شڕۆڤەكاران وەسا دبینن كو ئەڤە وەكی (پەنجەرەیەك) یان (ئاگەهداریەك) بۆ ئەمریكا بوو، نەك هاڤپەیمانیەكا هەردەم ئەگەر ئەمریكا ل داهاتووی دا هاریكاریێن خۆ زێدەبكەت ئەڤە ئەڤ رێكەفتنە ب لەز دێ هێتە ژبیركرن.
یانی ب كورتی و ل دویڤ بۆچوونا من و پڕانیا شڕۆڤەكارێن سیاسی ئەڤ رێككەفتنە رێككەفتنەكا دەم كورتە و ژبۆ ئامانجەكا دیاركری یا دەم كورت هاتیە هەبوونێ ب تایبەت پشتی ئەوان ئالۆزیێن ڤێ دووماهیێ یێن دەڤەرێ.
