ژڤانێ هەڤڕكیێن پارائۆلمپیادا ئاسیا هاتە دیاركرن و كۆڤان حەسەن بەرهەڤییان دكەت
قەیس وەیس:
ب فەرمی لژنەیا پارائۆلمپیادا ئاسیا 19ێ ئەیلوونا بهێت دەستنیشان كر ژبۆ ئەنجامدانا هەڤڕكیێن ئۆلمپیادا ئاسیا 2026ێ بۆ خودان پێدڤیێن تایبەت، ئەوا بڕیارە هەڤڕكیێن وێ ل باژێرێ ئیتچی- ناگۆ یا وەلاتێ چاپانێ بۆ ماوەیێ دو حەفتیان ب پشكدارییا 469 یاریزانێن كوڕ و كچ ژ 47 هەلبژارتیێن ئاسیا بۆ 43 یارییان پشكداربن، ئەڤچەندە هات پشتی دەنگۆیێ پاشئێخستنا وێ هاتبوو ڕاگەهاندن.
كوڕێ باژێرێ ئاكرێ كۆڤان حەسەن یاریزانێ هەلبژارتیێ ئیراقێ بۆ یاریێن مەیدانێ ل سەر ئاستێ خودان پێدڤیێن وەكو تاكە یاریزانێ كوردستانی و هەلگرێ میدالییا ئۆلمپیادا ڕیۆ دی جانیرۆ 2016ێ دێ د ڤێ قارەمانیێ دا پشكدارە و گۆت: ئەڤ قارەمانییە بۆ من گەلەك یا گرنگە و دێ بیتە قووناغەكا دیتر و ڤەگەڕیان بۆ ناسناڤێن خوە، د ڤێ قارەمانیێ دا دێ بۆ هاڤێتنا پارسەنگی و رومی پشكداریێ كەم،ئەڤە بۆ ماوەیەكە ڕاهێنان ل دووڤ سیستەمەكی دهاتنە كرن، لێ پشتی ژڤانێ قارەمانیێ هاتیە دیاركر دێ ب شێوەیەكێ باشتر بەرهەڤیان كەین ب دانانا كەمپەكێ نافخۆیی، دووڤدا دێ كەمپەكا دەرڤەیی وەلاتی ل گەل هەلبژارتیێ ئیراقێ بۆ یاریێن مەیدانێ هێتە ڕێكخستن.
ژلایەكێ دووڤە ناڤهاتی ئەوچەندە ژی گۆت: ئەڤ ئۆلمپیادە گرنگیەكا تایبەت بۆ من هەیە لەوما ژی هەموو بزاڤان دكەم باشترین شێوە بەرهەڤیی بهێنە كرن پێخەمەت ژ لایەنێ جەستەیی و شیانان بەرهەڤبم، دبیت ئەركێ من ب سانەهی نەبیت، لێ دێ بزاڤێ كەم مفایی ژ شارەزاهییا خوە ل گەل پێشئێخستنا شیانێن خوە، ژبەركو دێ باشترین یاریزانێن ئاسیایی پشكداربن و هەڤڕكییەكا دژوار هەبیت، بۆ ڤێ قارەمانیێ دێ پشت بەستنێ ل سەر هەڤڕكیێن هاڤێتنا پارسەنگی كەم و هەكە دەلیڤە پەیدابوو دێ بۆ هاڤێتنا رۆمی ژی پشكداربم، ژبەركو دەم یێ مایی دشێن بڕیارێ د دوەختەكی دی دا بدەم، پشكدارییا من یا ئەڤجارە دێ هەموو بزاڤان كەم وەكو دەستكەڤتێن دی یێن نێڤدەولەتی و ئۆلمپی بكەمە دیرۆكەكا زێرین وەكو ئێك ژ یاریزانێن كوردستانی و بەرهەڤیێن من بۆ دەستكەڤتەكێ نێڤدەولەتی یە.
بۆ زانین یاریزانێ ناڤهاتی كوردستانیێ ئێكانەیە د ناڤ پێكهاتیێ هەلبژارتیێ ئیراقێ بۆ یاریێن مەیدانێ دا و شیایە زێدەتر125 میدالیێن رەنگین د قارەمانیێن جودا یێن نێڤدەولەتی، ئەرەبی و جیهانی بدەستڤە بینت ژوانا دەستكەفتا ئۆلۆمپیادا جیهانی ریۆ دی جانیرۆ یا 2016ێ ل بەرازیل میدالیا زێری بۆ هاڤێتنا رۆمی مەزنترین دەستكەڤتە كو شیابوو ب دووراتیا 41م و 82سم پاڤێژییت و ڕیكۆردەكا نوو تۆماربكەت، دیسان چەندین میدالیێن زێری و زیڤی د قارەمانیێن نێڤدەولەتی، ل وەلاتێن ئنگلتەرا، چیك، قەتەر و ئیماراتێ ب دەستڤە بینیت.
