ڤۆلی بۆلا سەنحاریب دەربازبوو چارگۆشەیا زێڕین
قەیس وەیس:
یما ڤۆلی بۆلا یانەیا سەنحاریب ب فەرمی دەربازبوو قووناغا چار گۆشەیا زێرین وەكو خودانا ڕێزا ئێكێ یا كۆما ئێكێ ژ ڤاڤارتنێن خولا ئیراقێ ل سەر ئاستێ كچان ئەوا ب پشكدارییا 10 یانەیێن هەرێمێ و ئیراقێ ل هۆلا گرتییا یانەیا سەنحاریب بۆ ماوەیێ پێنج رۆژان یا بەردەوام بوو.
كچێن سەنحاریب شیان د كۆما خوە دا چارسەركەڤتنان ل سەر ئێك بینن بەرانبەر هەر ئێك ژ یانەیێن قەرەقووش، ئەمانەت بەغدا، مەسافی ئەلشیمال و یانەیا ئەلسباحە و ڕێزا ئێكێ بهێن ب كۆمكرنا 12 خالان، دووڤدا یانەیا قەرەقووش ب جووداهییا تۆماركرنا خالان ژ ئەمانەت بەغدا ڕێزا دویێ هات و دەربازبوو، د كۆما دویێ دا هەردو یانەیێن ئەكاد عەنكاوە ژ هەولێرێ وەكو خودانا ڕێزا ئێكێ ب 12 خالان و دەربەندیخان ژ سلێمانیێ ب نەهـ خالان ڕێزا دویێ هاتن و دەربازبوونە هەمان قووناغ.
ل دۆر قووناغا چارگۆشەیا زێرین ستان بازی هاریكارێ ڕاهێنەرێ تیما ڤۆلی بۆلا یانەیا سەنحاریب بۆ ئەڤرۆ گۆت: ئەم شیاین ب سەرفەرازی پێنگاڤا ئێكێ یا بەر ب پاراستنا ناسناڤێ خوە پاڤێژین، هەرچەندە دناڤا یاریگەهـ و جەماوەرێ مە دابوو ئەڤە ژی پالدەرەك بوو، لێ دەربازبوون بۆ چارگۆشەیا زێرین وەكو ئێكەم پێنگاڤا مە یە بۆ پاراستنا ناسناڤێ خوە و ئەم ڕژدین ل سەر ڤێ ئارمانجێ، پێنەڤێت قووناغا بهێت بۆ مە دێ ب زەحمەتر بیت و هەڤڕكی ل سەر ناسناڤی یا دژوار بیت تایبەت بەرانبەر هەڤڕكا مە یا پار یانەیا ئەكاد ئەوا ئەم شیاین ل یاریگەها وێ ناسناڤێ ئیراقێ ب دەستڤە بینن.
هەروەسان ناڤهاتی گۆت: ئەم سۆپاسییا پشتەڤانێن خوە دكەین هەروەسان مۆرالا بلند یا یاریزانان كو شیان چار سەركەڤتنا ل دووڤ ئێك بینن، بۆ قووناغا بهێت دێ باشتر خوە بەرهەڤكەین، سەرباری ئەركێ مە ب سانەهی نابیت، لێ هەموو هیڤیێن مە ئەوە ئەم دوبارە ناسناڤی ببەین و نوونەراتییا پارێزگەها دهۆكێ و كوردستانێ و ئیراقێ د قارەمانییەكا دەرڤە دا بكەین، لەوما ژی دێ بەرنامەیەكێ تایبەت یێ ڕاهێنانان هەبیت بۆ هندێ بشێن باشترین شێوە بەرهەڤبین و مە باوەری ب شیانێن یاریزانێن خوە هەیە.
