گرۆپێن حەشدا شەعبیبەرانبەر بێ دلۆڤـانیا ئەمریكا
ڕەمزی سیسۆ
پشتێ چوونا سەرۆك وەزیرێن ئیراقێ «عەلی زەیدی» بۆ ئەمریكا و زڤڕینا وی، ل رۆژا 29/07/2026 ئەمریكا و سعوودیە هێرشەكا مەزن كرە سەر بارەگایێن حەشدا شەعبی. بەلێ ئەڤ جارە قەبارەیێ ڤێ هێرشێ گەلەك مەترسی بوو، ژبەركو دەولەتا سعوودیێ ب شێوازەكێ راستەوخۆ ب هەماهەنگی ل گەل ئەمریكا هێرش كرە سەر بارەگایێن حەشدا شەعبی، ئەڤە ژی چەندین رەهەندێن سیاسی و ئابووری د پشت را هەنە.
ئــەرێ چما ئـەڤ هێرشە د ڤـی دەمـی دا هـات؟
ئێك: هەڤسەنگیا هێزێ دێ هێتە گوهۆڕین بۆ بەرژەوەندیا ئەمریكا و ئیسرائیلێ.
ئەمریكا نەشێت بێدەنگ بیت ل سەر مانا گرۆپێن چەكدار یێن ب سەر ئیرانێ ڤە. ئەو دزانیت مانا وان مانا نفوسا ئیرانێ یە ل ئیراقێ.
دو: ئیسرائیل دخوازیت شەڕەكێ دی ل دەڤەرێ رووی بدەت، ئەڤ جارە ب سیمایەكێ مەزهەبی.
چما مەزهەبی؟ ژبەركو ئەگەر شەڕ ببیتە شیعە و سوننە، ئیسرائیل دێ ب تنێ مینیت و هەمی عەرەب دێ ب ئێكدو كەڤن. ئەڤە خەون و پلانا ئیسرائیلێ یە ل دەڤەرێ.
سێ: ئەمریكا و سعوودیە بۆ ئیراقێ دایە دیار كرن كو د پرسا حەشدا شەعبی دا چ سازش ناكەن.
پەیاما وان روون بوو: یان حەشدا شەعبی دێ هێتە هەلوەشاندن و دچیتە دناڤ سوپایێ ئیراقێ دا، یان ئەم دێ هەلوەشینین.
چار: راكێشانا سعوودیێ بۆ ناڤ شەڕی.
ژبەركو سعوودیە سەركێشا دەولەتێن كەنداوێ یە. ئەگەر سعوودیە هاتە ناڤ شەڕی، واتە قەتەر، كوێت، ئیمارات هەمی دێ هێنە ناڤ شەڕی.
پێنج: سعوودیە ژی هەست ب مەترسیا گروپێن چەكدارێن ب سەر ئیرانێ ڤە كریە و دخوازیت خوە ژ ڤێ دورپێچێ رزگار بكەت.
سعوودیە دزانیت ئەگەر ئیران ب هێز بمینیت، دۆرپێچا حوسی و حەشدێ ل دور سعوودیێ دێ تەنگتر بیت.
شەش: مانا گرۆپێن چەكدار مانا نە ئارامییە ل دلێ ئابووریا جیهانێ.
جیهان نەشێت قەبیل بكەت نەفتا جیهانێ د دەستێ چەند گرۆپێن چەكدار دا بیت. هەر مووشەك ل سەر كەنداوێ، نەفتێ دكەتە 150 دۆلاران.
ئــەنـجام چیە؟
خوە ئەڤ شەڕە نە شەڕێ حەشدێ یە بتنێ یە، شەڕێ داهاتوویێ ئیراقێ یە. ئیراق دێ مینیت وەك دەولەت، یان دێ بیتە مەیدانا شەڕێ وەكالەتێ د ناڤبەرا ئیرانێ و سعوودیێ دا؟
ئەم وەك هەرێما كوردستانێ دڤێت زۆر ب هوشیاری سەح بكەین. نابیت ئەم ببینە بەشەك ژ ڤی شەڕێ مەزهەبی. رێكا مە دیالۆگ و دویركەفتنە ژ هەمی لایەنان.
ئەگەر حەشدا شەعبی نەچیتە د ناڤ دەولەتێ دا، دێ بیتە ئەگەرێ تێكدانا هەمی دەڤەرێ.
