یانەیێن دهۆك و زاخۆ دێ كەمپا خوە ل توركیا دانن و نەورۆز دێ ل هەولێر بیت
قەیس وەیس:
پشتی بۆ ماوەیێ دو حەفتییان ژ ڕاهێنانێن رۆژانە و ئینانا كۆمەكا یاریزانێن ناڤخوە و دەرڤە یانەیێن كوردستانی بەردەوامن ل سەر بەرهەڤییان بۆ وەرزێ نوو یا خولا ستێرێن ئیراقێ 2026-2027، ئەوا بڕیارە هەڤڕكیێن وێ ل 13ێ مەها بهێت دەستپێبكەت، یانەیێن دهۆك ژبلی ئینانا یاریزانان و ڕاهێنانێن رۆژانە بریار دا كەمپا دەرڤە ل وەلاتێ توركیا بهێتە دانان و یانەیا نەورۆز دێ ل هەولێرا پایتەخت بەرهەڤیان كەت.
پێكهاتی ب دووماهی هاتییە و ئەلهۆ دێ فڕنە توركیا
بڕیارە سوبەهی تیما فوتبۆلا یانەیا دهۆك دەست ب قووناغا دویێ یا بەرهەڤیێن خوە یێن ڕاهێنانێ كەن پشتی ب دووماهی هاتنا پێكهاتیێ تیمێ و دێ بەر ب وەلاتێ توركیا چن ژبۆ دانانا كەمپەكێ ڕاهێنانێ خوە بەرهەڤكرن بۆ سۆپەرا كەنداڤی و خولا ستێرێن ئیراقێ، یانەیا دهۆك دیاركر پێكهاتیێ ب 26 یاریزانێن نافخۆ، ئیراقی و پیشەكار تمام بووینە و ڕاهێنەرێ تیمێ یێ ئیرانی یەحیا گۆلمحەمەد بەرنامەیەكێ تایبەت دانایە كو دێ كەمپێ ڕاهێنانێ ل باژێرێ ئسپارتا یێ توركیا ل 16ێ هەتا 31ێ ڤێ مەهێ بەردەوامبیت، تێدا رۆژانە ڕاهینانێن جەستەیی و لەشسڤكیێ هەبن دیسان هەتا سێ یاریێن هەڤالینی دێ ئەنجامدەن.
زاخۆ دێ چیتە بۆردۆرێ
ژلایێ خوەڤە كارگێرییا یانەیا زاخۆ یا ڕژدە ئەڤ سالە تیما وان یا فوتبۆلێ بشێت هەڤڕكیێ ل سەر پلێتەكا دەرڤە یان هەڤڕكی بۆ ناسناڤەكی بكەت، هەتا نوكە كۆمەكا گرێبەستێن گران بوها ئیمزاكرینە ژوانا هێرشبەرێ ئۆزپاكی و گۆلكەرێ وەرزێ بۆری یێ خولا ئیراقێ شیرزۆد ئەو هاتیە بەلاڤكر گرێبەستا ئێك وەرز گەهشتییە ملیاردەك و زێدەتری دوسەد ملیۆن دیناران، تیما زاخۆ ب سەركێشییا ڕاهێنەرێ فرەنسی دێ كەمپا ڕاهێنانێ ل 21ێ ڤە مەهێ هەتا شەشێ مەها بهێت یا تەپاخێ ل باژێرێ بۆردۆر یێ وەلاتێ توركیا دانین كو ل دووڤ بەرنامەیێ ڕاهێنانێ رۆژانە دو یەكەیێن ڕاهێنانێ یێن جەستەیی و لەشسكڤیێ هێنە ئەنجامدان، هەروەسان ڕێكەڤتن هاتیە كرن دگەل هەرسێ یانەیێن ئامەد سپۆر و ئەنتالیا سپۆرت یێن توركی و نەجمە یا سعۆدیێ بۆ ئەنجامدانا سێ یاریێن هەڤالینی بەری كەمپێ خوە ب دووماهی بینین.
