زێدەتری پێنج ھزار قوتابخانان ڤەکۆلەرێن دەروونی و جڤاکی نینن
ئەڤرۆ نیوز، نەوزاد ھلۆری :
ھەر چەند بریار بو کو حکومەتا ھەرێما کوردستانێ ل گەل دامەزراندنا ماموستایان ب شێوازێ گرێبەست ڤەکولەرێن جڤاکی و دەروونی ژی ل قوتابخانەیان ب ھەمان شێوە دابمەزرینیت ، بەلێ ھەتا نھا زێدەتری پێنج ھزار قوتابخانەیان ڤەکولەرێن دەروونی و جڤاکی نینن ، و ڤەکولەرەکێ جڤاکی ژی دیارکر کو پێدڤی بوو زویتر ھزر دڤێ یەکێ دا ھاتباکرن ، و ب ھزرا وی ھندەک قوتابی ژ دەست دەرکەفتینە و پێدڤی یە دووبارە بھێنە زڤراندن بو سەر رێیا پەروەردەی.
جیھاد موستەفا قوتابیەکە دیارکر کو د ئەڤرو ل ناڤەندێن قوتابخانەیان دا دەھان ئاریشە دناڤبەرا ماموستا و قوتابیان دھێنە دیتن و کەس خوە لێناکەت خودان و گۆت : ( ھندەک قوتابیێن ڤی وەختی ژ دەستێ ماموستا و دایبابان دەرکەفتی نە کو ئەڤێ یەکێ کارتێکرن ل پروسەیا خواندنێ کریە ژ بەرڤێ پێدڤی یە ھزر د وێ یەکێ دا بھێتەکرن کو قوتابخانە مولکێ گشتی یە و نابیت ھندەک قوتابیێن خودان ئاریشە ببنە ئەگەرا ژ دەستدانا مافێ خواندنێ ل قوتابخانان ، و ب ھزرا من تاکە رێیا خوە بکەت خودان ل ئەڤان ھەموو ئاریشان دەستنیشانکرنا ھندەک کەسانێن بسپوورە مینا ڤەکولەرێن جڤاکی و دەرونی دناڤەندێن قوتابخانە و ھەتا خوە زانکو و پەیمانگەھان ژی).
ماموستا شڤان محەمەد ل دەڤەرا ئامێدیێ دیارکر کو دامەزراندنا ڤەکولەر و دەروونناسان ژ گەلەک پێدڤیێن قوتابخانان گرنگترە و گۆت : (چوو قوتابخانە بێی ئاریشە نابن ، بەلێ چوو ئاریشە بێی چارەسەری ژی نینن ، و باشترین رێیا چارەسەرکرنا ھەر ئاریشەکێ بێگومان دێ ڤەکولەرێن جڤاکی و دەروونی بن دناڤ قوتابخانەیان دا ، ژبەرکو ماموستا بخوە نکارن ئاریشەیان چارەسەر بکەن ژبەرکو ئەو بو گوتنا وانێ چوینە قوتابخانێ نەک چارەسەرکرنا ئاریشەیان ، ژ بەرڤێ ھەبوونا کەسانێن بسپوور دناڤەندێن خواندنێ دا گرنگیەکا زورا مەزن ھەیە و پێدڤی یە گرنگی پێ بھێتەدان).
ئەحمەد سالح سەرپەرشتیارێ پەروەردەیی ل پەروەردا قەزا ئامێدیێ دیارکر کو قوتابخانەیێن بنەرەتی ب تایبەتی رێزێن حەفت و ھەشت و نەە پتر پێدڤی ب ڤەکولەرێن جڤاکی و دەروونی ھەیە و بۆ ئەڤرۆ نیوز گۆت : ( دامەزراندنا ڤەکولەرێن جڤاکی و دەروونی ل قوتابخانەیان پێنگاڤەکا گەلەکا پێدڤی و گرنگ بوو ھاتیەدان ژ بەرکو ھەتا نھا چوو تشتەک نینە د ناڤەندێن خواندنێ دا کو ئاراستەیا ئاریشەیێن ماموستا و قوتابیان بگوھرن و بەر ب خواندنێ ڤە ببەن و دڤێت ڤەکولەرێن جڤاکی و دەروونی ژی پتر کار بکەن کو قوتابیان بەر ب خواندنێ و خوە گونجاندنێ و سەرەدەریێ دگەل ماموستایان ڤە ببەن و ب ئەرکێ خوە رابن نەک بتنێ بچیتە دەوامێ و رۆژانێن خوە ببوورینیت).
ھێشتا گۆت: (راکرنا ھندەک بریارێن مینا نەقوتانا قوتابیان ھندەک ئەرێنی دناڤبەرا قوتابی و ماموستایان درۆستکرینە ، ژبەرڤێ دڤێت ھندەک پێگورکێن مینا ڤەکولەرێن جڤاکی و دەروونی پەیدا ھەبن بەروڤاژی دێ بیتە سەدەما ھندێ کو تێک نەگەھشتن دناڤبەرا ماموستا و قوتابیان درۆست ببیت ب تایبەتی قوتابیێن سنێلە ، و ب تەخمینا من زێدەتری پێنج ھزار قوتابخانەیێن ھەرێما کوردستانێ ڤەکولەرێن دەروونی و جڤاکی نینن).
دلێر جانگیر ڤەکولەرێ جڤاکی دیارکر کو دامەزراندنا ڤەکولەرێن جڤاکی و دەروونی پێدڤی یەکا ھەری گرنگە و گۆت: (سەرا بچوکترین ئاریشە دناڤبەرا ماموستا و قوتابیان نھا دەھان قوتابی لسەر گوھێن دایبابێن خوە ماینە و د ئەنجام دا دەھان رەفتارێن شاش پشتی بێ بەھربوونا ل قوتابخانێ دناڤ جڤاکی دا ب دەستێ وان ھاتینە ئەنجامدان ، و ب دامەزراندنا ڤەکولەرێن جڤاکی و دەروونی دێ بیتە سەدەم کو جارەک دن ئەڤان قوتابیان ژ بوو قوتابخانەیان بزڤرینن ڤە و ھەر چو نەبیت ل ئەڤرو وێڤە ئەڤ یەک ببیتە ئەگەرا ھندێ کو ئاریشەیێن دناڤبەرا ماموستا و قوتابیان نەھێلن یان کێم بکەن).
ڤەکولەرێ جڤاکی ھێشتا گۆت: (باشتر ئەوە ل ھەر قوتابخانەیەکێ ڤەکولەرێ جڤاکی یان دەرونیێ خوەیێ تایبەت ھەبیت نەک چەند ڤەکولەرێن جڤاکی و دەروونی بدانن و لسەر قوتابخانەیان بگەرن ژ بەرکو کارێ ڤەکولەر و دەرونناسان یێ سەرەکی ئەوە دڤێت د دناڤەراستا جھێ ئاریشێ دا بژیت داکو تێبگەھیت و بزانیت چەوا چارەسەر بکەت).
