لژنا پێشمه‌رگه داخواز دكه‌ت رێژا پاشكه‌فتكرنا مووچێ پێشمه‌رگه‌ى كێمتر ببيت
ئه‌ڤرۆنيوز:
لژنا پێشمه‌رگه وشه‌هيدان ل په‌رله‌مانێ كوردستانێ راگه‌هاند، پێدڤيه پاشكه‌فتكرنا مووچێ هێزێن پێشمه‌رگه‌ى كێمترين پاشكه‌فت بۆ بهێته كرن، چونكى پێشمه‌رگه سه‌نگه‌رێن وه‌لاتى دپارێزن.
لژنا كاروبارێن پێشمه‌رگه وشه‌هيدان وقه‌ربانيێن جينوسايد وزيندانيێن سياسى ل په‌رله‌مانێ كوردستانێ، ئه‌ڤرۆ چارشه‌مبى 10/1/2018، كۆمبوونا خۆه ئه‌نجامدا ودانوستاندن ل سه‌ر كێمكرنا مووچێ هێزێن پێشمه‌رگه‌ى كر ودووپاتى ل سه‌ر وێ چه‌ندێ هاته كرن كو پێدڤيه رێژا پاشكه‌فتكرنا مووچێ پێشمه‌رگه‌ى گه‌له‌ك يێ كێم بيت، چونكى پێشمه‌رگه سه‌نگه‌رێ وه‌لاتى دپارێزن.
د كۆمبوونا لژنا ناڤبرى دا، ل دووڤ سايتێ په‌رله‌مانێ كوردستانێ، به‌حس ل چاكسازيێن وه‌زاره‌تا پێشمه‌رگه هاته كرن ولژنا پێشمه‌رگه يا په‌رله‌مانى پشته‌ڤانيا خوه بۆ چاكسازيان كر كو ب مه‌ره‌ما كێمكرنا گه‌نده‌ليێ ونه‌دادپه‌روه‌ريێ بيت، ديسا بريار هاته دان كو لژنا ناڤبرى دهه‌ماهه‌نگى وپه‌يوه‌نديێن به‌رده‌وام دا بيت ل گه‌ل وه‌زاره‌تا پێشمه‌رگه .
