وه‌زاره‌تێن په‌روه‌ردێ وساخله‌ميێ رۆهنكرنه‌ك به‌لاڤكر
ئه‌ڤرۆنيوز:
وه‌زاره‌تێن په‌روه‌ردێ وساخله‌ميێ رۆهنكرنه‌ك ل دۆر كۆمبوونا ئه‌ڤرۆ ل به‌غدا يا لژنا هووربينيێ دمووچێن فه‌رمانبه‌رين هه‌ردو وه‌زاره‌تان دا به‌لاڤكر.
د وێ رۆهنكرنێ دا كو ژلايێ لژنا هووربينيێ يا هه‌ردو وه‌زاره‌تان دا هاتيه ده‌ركرن، هاتيه” ئه‌ڤرۆ چارشه‌مبى 17/1/2018، دوه‌مێن كۆمبوونا لژنا هووربينيا هه‌ردو وه‌زاره‌تين ساخله‌ميێ وپه‌روه‌ردێ ل وه‌زاره‌تا پلاندانا عيراقا فيدرال هاته ئه‌نجامدان، ب به‌رهه‌ڤبوونا سه‌رۆك وئه‌ندامێن لژنا بلند وشيره‌تكارێ دارايى ل وه‌زاره‌تين دارايى وساخله‌ميێ ل هه‌رێما كوردستانێ وسه‌رۆكێ لژنا بايۆمه‌ترى ل وه‌زاره‌تا په‌روه‌ردێ ل گه‌ل رێڤه‌به‌رێ گشتيێ يێ چاڤدێريا دارايى ل حوكمه‌تا عيراقا فيدرال”.
رۆهنكرنێ دياركر” دكۆمبوونێ دا بريار هاته دان كو تيمێن چاڤدێريا دارايى يا عيراقى كو پێك دهێن ژ 16 هووربين بهێنه به‌لاڤكرن ل سه‌ر چار تيمان ول هه‌فتيا بهێته دێ سه‌ره‌دانا هه‌ردو وه‌زاره‌تين ساخله‌ميێ وپه‌روه‌ردێ كه‌ن ب مه‌ره‌ما ده‌ست پێكرنا پرۆسا هووربينيا ليستا مووچه‌خۆرێن هه‌ردو وه‌زاره‌تان ب رێيا وه‌رگرتنا چه‌ند نموونان، هه‌روه‌سا لژنه دێ رازيبوونا ده‌ربريت ل سه‌ر بلندكرنا پێشنيارێن نوونه‌رێن وه‌زاره‌تێن حوكمه‌تا هه‌رێمێ بۆ مه‌زاختنا مووچه‌كێ تمام ل گه‌ل ده‌ستپێكرنا كارێ لژنا هووربينيێ بۆ ئه‌ميندارێ گشتيێ جڤاتا وه‌زيرێن عيراقێ”.
د رۆهنكرنا لژنا هووربينيا هه‌ردو وه‌زاره‌تێن ساخله‌ميێ وپه‌روه‌ردێ دا هاتيه ژى” داخواز هاته كرن له‌زكرن دپرۆسێ دا بهێته كرن وليستا بايۆمه‌ترى يا حوكمه‌تا هه‌ريمێ ببيته بنه‌ما بۆ مه‌زاخنا مووچێ فه‌رمانبه‌ران”.
