عيراق وبريتانيا ل دۆر په‌ترۆلا كه‌ركووكێ دێ گرێبه‌سته‌كێ ئيمزا كه‌ن
ئه‌ڤرۆنيوز:
برياره ئه‌ڤرۆ پێنجه‌شمبى 18/1/2018، وه‌زيرێ په‌ترۆلا عيراقێ سه‌ره‌دانا باژێرێ كه‌ركووكێ بكه‌ت ب مه‌ره‌ما ئيمزاكرنا گرێبه‌سته‌كێ ل گه‌ل كۆمپانيه‌كا بريتانى بۆ به‌رهه‌مئينانا په‌ترۆلا كه‌ركووكێ.
ژێده‌ره‌كى ژ راگه‌هاندنا كۆمپانيا په‌ترۆلا باكوور ل كه‌ركووكێ، ل دووڤ كورديوو، راگه‌هاند” برياره ئه‌ڤرۆ پێنجشه‌مبى، جه‌بار لعێبى وه‌زيرێ په‌ترۆلا عيراقێ سه‌ره‌دانا كۆمپانيا په‌ترۆلا باكوور بكه‌ت ل پارێزگه‌ها كه‌ركووكێ وئارمانج ژسه‌ره‌دانا وى ئيمزاكرنا گرێبه‌سته‌كێ دناڤبه‌را كۆمپانيا په‌ترۆلا باكوور وكۆمپانيا bp يا بريتانى بۆ بلندكرنا ئاستێ به‌رهه‌مئينانا په‌ترۆلێ بۆ مليۆن به‌رميلان درۆژه‌كێ دا”.
ل دووڤ وێ رێككه‌فتنا دناڤبه‌را وه‌زاره‌تا په‌ترۆلا عيراقێ وحوكمه‌تا ئيرانێ، برياره ل دووماهيا ڤێ هه‌يڤێ، رۆژانه ب رێيا تانكه‌ران 30 هزار به‌رميلێن په‌ترۆلا كه‌ركووكێ بهێنه هنارتن بۆ پالاوگه‌هێن كه‌رماشانێ وپاشى ئه‌و رێژه بۆ 60 هزار به‌رميلان درۆژه‌كێ دا بهێته بلندكرن.
