بۆردۆمانا توركيا بۆ عه‌فرينێ يا به‌رده‌وامه
ئه‌ڤرۆ نيوز:
بۆردۆمانا سۆپايێ توركيا و گرۆپێن چه‌كدارى يێن سوريا كو د نێزيكن ژ ئه‌نقه‌ره بۆ سه‌ر ده‌ڤه‌رێن كانتۆنا عه‌فرين يا به‌رده‌وامه و دوهى ژى شه‌ر و پێكدادان د ناڤبه‌را شه‌رڤان و گرۆپێن چه‌كدار دا روودا.
ب گۆره‌ى ئاژانسا هاوارنیوز، شه‌ڤا بۆرى سۆپايێ توركيا ب مووشه‌ك و تۆپ و هاونان، گۆندێ ئه‌قيبه ل باژێرێ شێراوا، هه‌روه‌سا گۆندێن ئيسكا، بليلكۆ، قه‌ره‌بابا، سوركا يێن سه‌ر ب ناحيا راجۆ ل كانتۆنا عه‌فرين بۆردۆمان كرن و فرۆكێن چاڤدێريێ يێن توركيا ل ئه‌سمانێ راجۆ د زڤرين.
هه‌ڤده‌م بۆردۆمانێن سۆپايێ توركيا و گرۆپێن چه‌كدار ل نێزيك سۆپايى ل باژێرێ مارع بۆ سه‌ر گۆندێ حساجك و سمۆقه ل كانتۆنا شه‌هبا ل بن كونترۆلا شه‌رڤانان يا به‌رده‌وامه.
شه‌رڤانان به‌رسڤا ژێده‌رێ بۆردۆمانێن سۆپايێ توركيا و گرۆپێن چه‌كدار ل ده‌ڤه‌رێن مارع دايه و د ئه‌نجام دا، دو چه‌كدارێن هێزێن نێزيك ژ توركيا هاتينه كوشتن و 12 چه‌كدار ژى بريندار بووينه.
ب گۆره‌ى ئاژانسێ سۆپايێ توركيا ل گۆندێ يازيباغ سه‌ر ب ده‌ڤه‌را عه‌زاز ل رۆژهه‌لاتێ عه‌فرين بنه‌جهـ بوون، هه‌روه‌سا تانك ل ده‌وروبه‌رێن گۆندێ ديكمه‌داش سه‌ر ب باژێركێ شه‌رايان بۆردۆمان كريه ژبلى زيانێن ماددى، چو زيانێن گيانى نه‌بووينه.
ب هه‌مان ره‌نگ سۆپايێ توركيا ل ده‌ڤه‌رێن ئيدلب ل رۆژئاڤايێ سنورێ عه‌فرينێ بنه‌جهبووينه، بوردمانا گۆندێ جه‌له‌مه‌يان يا سه‌ر ب كانتۆنا عه‌فرينێ كريه و هه‌تا نوكه ژى بۆردۆمان د به‌رده‌وامن.
