چاڤدێره‌كێ سیاسی: خیانه‌تا 16 ئوكتۆبه‌رێ ئه‌و وێره‌كی دایه دۆژمنێن كوردان هاربن
ئه‌ڤرۆ نيوز، زنار تۆڤی:
چاڤدێره‌كێ سیاسی و ماسته‌ر د سیاسه‌ت و په‌یوه‌ندیێن نێڤده‌وله‌تی دا هه‌یه، د دیداره‌كێ دا بۆ رۆژناما ئه‌ڤرۆ دبێژیت، هه‌ر سێ وه‌لاتێن توركیا و ئیرانێ و عێراقێ ل دژی هه‌رێما كوردستانێ پیلانه‌ك هه‌بوو، وێ پیلانێ ژی د ئێك تشت دا ل گه‌ل سیاسه‌تا نێڤده‌وله‌تی دا ئێك دگرت،كو ئه‌و ژی ئه‌و بوو د سیاسه‌تا نێڤده‌وله‌تی دا و ب تایبه‌تی یا ئه‌مریكا و رووسیا دا ئه‌وه، چو كیان بۆ كوردان نه‌هێنه چێكرن، له‌ورا یا پێدڤی ل سه‌ر كوردان ئه‌و بوو،كو وه‌كو به‌رهنگاری خوه فه‌رز بكه‌ن، هه‌ر چه‌نده ل سه‌ر ده‌مێ ریفراندۆمێ دا ئه‌و ده‌لیڤه بۆ كوردان چێبوو، لێ ژ ئه‌گه‌رێ خیانه‌تا مێژوویی یا جه‌رگبر ل 16 ئوكتۆبه‌رێ، هه‌تا راده‌یه‌كێ ئه‌و كارته ژ ده‌ستێ كوردان ده‌ركه‌فت،له‌ورا نه‌بوونا سیاسه‌ته‌كێ ژ لایێ وه‌لاتێن زلهێز ڤه،كو د به‌رنامێ وان دایه ده‌ستكاریێ د ڤێ ده‌ڤه‌رێ دا بكه‌ن،ئه‌و به‌رهه‌ڤیێن وه‌لاتێن ده‌وروبه‌ر هه‌نه بۆ لێدانا كیانێ كوردی،ل گه‌ل خیانه‌تا 16 ئوكتۆبه‌رێ ئه‌و وێره‌كی بۆ توركیا چێكر،كو پێنگاڤا ژناڤبرنا كوردان ل هه‌ردو پارچێن رۆژئاڤا و باشور بهاڤێژیت.
حه‌سه‌ن ئه‌حمه‌د مسته‌فای گوت:سه‌باره‌ت ئیرانێ ژی نوكه وێ ئاریشێن كوور ل گه‌ل ده‌وله‌تێن مه‌زن هه‌نه و دیسا نوكه ئیران راستی قه‌یرانه‌كا گه‌له‌ك دژوار بوویه،كو هه‌تا نوكه ئه‌ڤ چه‌نده د مێژوویا ئیرانێ دا روونه‌دایه،له‌ورا ئه‌وا ئیرانێ ڤیای ب رێیا عێراقێ و توركیا كر،له‌ورا وێ هێرش نه‌كر،لێ توركیا پلانا خوه ده‌ستپێكریه، هه‌روه‌سا پلانا توركیا ب پله‌یا ئێكێ پشت ب نهێنیه‌كا گه‌له‌ك مه‌زن و هه‌ستیار دبه‌ستیت.
حه‌سه‌ن زێده‌تر دبێژیت:ل سووریێ ئه‌و دابه‌شبوونا هه‌یی نه‌عه‌داله‌تیه‌ك تێدا هه‌یه بۆ هێزێن مه‌زن، ئه‌و نه‌عه‌داله‌تی ژی ئه‌وه كو 83% ژ نه‌فت و گازا سرۆشتی و ژێده‌رێن ئاڤێ و پرۆژێن ئه‌له‌كتریكێ و زه‌ڤیێن چاندنێ یێن هه‌ره باش ل سووریێ هه‌موو د سنوورێ جۆگرافیێ ئه‌مریكا دانه و د ده‌ستێ یه‌په‌گێ دانه،د هه‌مان ده‌مدا و به‌رۆڤاژی ڤێ چه‌ندێ ئه‌و سنوورێن جۆگرافی یێن بێ مفا و بێ ژێده‌رێن سروشتی د ده‌ستێ رووسیا دانه،هه‌روه‌سا یه‌په‌گه ل وی جهی ژی هه‌نه،له‌ورا ئه‌ردۆگانی ب عاقلانه بۆ خوه ئه‌و ده‌لیڤه دیت و گوته رووسیا،ئه‌ز یێ ئاماده‌مه هێرشێ بكه‌مه سه‌ر ده‌ڤه‌رێن كوردی و وان ده‌ڤه‌رێن ل ژێر ده‌ستێ كوردان و هێزێن ئه‌مریكی ئینمه‌ده‌ر،هوون ژی هاریكاریا من بكه‌ن،هه‌روه‌سا رووسیا وه‌كو مه‌غدوره‌كێ خوه دبینیت،دیسا رووسیا ب حه‌قێ خوه دزانیت كو سووریا ب ره‌نگه‌كێ ته‌قلیدی و سه‌دان ساله ب جۆگرافیا خوه دزانیت و ئه‌ڤرۆ وێ یاریێ تێدا بكه‌ت،ژ پێخه‌مه‌ت چه‌نده‌كێ ژ وێ ترازیێ راست ڤه‌كه‌ت،له‌ورا ئه‌ردۆگانی ب ره‌نگه‌كێ زۆر زیره‌كانه ئه‌و یاری دناڤبه‌را وان هه‌ردو هێزان داكر،ئه‌و جۆرێ یاریا توركیا دكه‌ت،بناغه‌كێ گه‌له‌ك كوور هه‌یه و ل ده‌مێ خوه ژی ئه‌تاتوركی ب هه‌مان شێوه یاری دناڤبه‌را ئه‌مریكا و رووسیا دا كریه،وی دگوته ئه‌مریكا ئه‌ز هه‌ڤپه‌یمانێ ستراتیجی یێ هه‌وه مه،لێ مفا ژ رووسیا وه‌ردگرت، هه‌ر چه‌نده نوكه‌ژی توركیا هه‌موو پشته‌ڤانیه‌كا رووسی هه‌یه،ژ لایێ چه‌كی و جه‌بلخانه و راگه‌هاندنێ و كور و كۆمبوونێن نێڤده‌وله‌تی ڤه،هه‌روه‌سا رووسیا زانیاریێن هه‌والگیریێ ژی دده‌ته توركیا،ئه‌ڤه د ده‌مه‌كێ دایه،كو توركیا هه‌ڤپه‌یمانیا ئه‌مریكا یه،دیسا ئه‌مریكا ژی نه‌شێت به‌رهنگاریا هێزه‌كێ بكه‌ت،كو ئه‌ندامه د ناتۆ دا و هێزا ئێكێ یه د ڤێ ده‌ڤه‌رێ دا ژ لایێ له‌شكرێ پیاده ڤه د ناتۆ دا،ژبه‌ر هندێ توركیا دڤێت عه‌فرینێ بگریت،هه‌روه‌سا هه‌كه ئه‌و دۆخه ب ڤی ره‌نگی بچیت،توركیا دێ شێت عه‌فرینێ گریت،هه‌ر چه‌نده یه‌په‌گه به‌رهنگاریه‌كا ب هێز ژ عه‌فرینێ دكه‌ت، لێ وێ به‌ره‌ڤانیێ هه‌مبه‌ری رووسیا و توركیا چارچۆڤێ خوه هه‌یه.
چاڤدێره زێده‌تر دبێژیت: پشتی عه‌فرینێ توركیا دێ فشارێ ل سه‌ر ئه‌مریكا كه‌ت، هه‌ر چه‌نده ئه‌و فشار دێ د سیاسی و دبلۆماسی بن، دێ فشارێن وێ گوهۆرینا روویێ وێ ژ ناتۆیێ بۆ رووسیا بن، له‌ورا ئه‌مریكا ده‌لیڤا هندێ ناده‌تێ و دێ یا ئاماده بیت،كو مامه‌لێ ب كوردان بكه‌ت،ل سه‌ر بابه‌تێ كۆبانێ و جزیرێ، ئه‌مریكا دێ یا به‌رهه‌ڤ بیت،وان ده‌ڤه‌ران راده‌ستی له‌شكرێ سووری بكه‌ت، چونكی ئه‌مریكا حه‌ز ناكه‌ت ئیسلاما سیاسی یا توندره‌و ل سه‌ر ده‌ستهه‌لاتێ بیت، چونكی ئه‌مریكا دناڤبه‌را ئیسلاما سیاسی و به‌شار ئه‌سه‌دی دا دێ به‌شاری هه‌لبژێریت، هه‌روه‌سا پشتی رۆژئاڤایێ كوردستانێ پێنگاڤا ئه‌ردۆگانی یا دویێ هێرشكرنه بۆ سه‌ر شنگالێ، هه‌م ژ لایێ سووریێ ڤه و هه‌م ژ لایێ پێشابیرێ ڤه، ئه‌ڤ چه‌نده گه‌له‌ك یا ب مه‌ترسیه ل سه‌ر هه‌رێما كوردستانێ، دڤێت سه‌ركرداتیا كوردستانێ گه‌له‌ك ب رژدی ژ لایێ نێڤده‌وله‌تی ڤه بزاڤێ بكه‌ت و رێكێ نه‌ده‌ت،كو ئه‌ڤ پلانا توركی بهێته بجهئینان، چونكی ئارمانجا سه‌ره‌كی یا توركیا پێشابیرێ یه و دروستكرنا رێیه‌كێ یه دناڤ توركومانان دا بۆ ته‌له‌عفه‌ر، چونكی عێراقێ پێدڤی ب 100 ملیاران دۆلاران هه‌یه بۆ ئاڤه‌دانكرنا عێراقێ، هه‌كه ئه‌ڤ 100 ملیار دۆلاره ب رێیا ئیبراهیم خه‌لیل را بهێنه عێراقێ، ب لایه‌نێ كێم ڤه دێ 10 ملیار دۆلار ژ وان پاران گه‌هنه هه‌رێما كوردستانێ، له‌ورا وان نه‌ڤێت ئه‌و 10 ملیار دۆلاره بگه‌هنه كوردان، ژبه‌ر هندێ ئه‌و دێ ئاڤه‌دانكرنا عێراقێ ژی گیروكه‌ن، ژ پێخه‌مه‌ت ئه‌و قازانجه نه‌گه‌هیته هه‌رێما كوردستانێ ب رێیا ده‌رگه‌هێ ئیبراهیم خه‌لیل.
