مه‌سرور بارزانى:بجهئينانا دستوورى رێ چاره‌يا بده‌ستڤه‌ئينانا سه‌قامگيريێ يه
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ مه‌سرور بارزانى، ئه‌ڤرۆ سێشه‌مبى 10/4/2018 پێشوازى ل مه‌كسيم ماكسيمۆڤ باليۆزێ رووسيا ل عيراقێ كر ودكۆمبوونه‌كێ دا دووپاتى ل سه‌ر هاريكاريێ وپه‌يوه‌نديێن رووسيا وهه‌رێما كوردستانێ هاته كرن.
ل دۆر بزاڤێن چاره‌كرنا كێشه وگرفتان ودانوستاندنێن دناڤبه‌را هه‌ولێرێ وبه‌غدا، باليۆزێ رووسيا خوه‌شحاليا خوه بۆ پێشڤه‌چوونا دانوستاندنێن دناڤبه‌را هه‌ردوئالياندا ده‌ربرى وهيڤى خواست هه‌لبژارتنێن عيراقێ وهه‌رێمێ ب سه‌ركه‌فتى ب رێڤه‌بچن وببنه ده‌ستپێكا قۆناغه‌كا نوو بۆ چاره‌سه‌ريا هه‌موو كێشان.
مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ، ئاماژه ب هه‌لبژارتنان وپێنگاڤێن ددووڤدا كر كو وه‌كو هه‌رێما كوردستانێ ڤيتۆ ل سه‌ر چو ليست وئاليه‌كى نينه ودووپاتى ل گرنگيا رێزگرتن وپێگيريێ ب دستوورى وهه‌ڤپشكيا راسته‌قينه كر وراگه‌هاند”
پێدڤيه بزاڤ بهێته كرن ره‌وشا عيراقێ ب جۆره‌كى بهێته ئاساييكرن كو هه‌موو پێكهات هه‌ست ب پشتراستبوونێ بكه‌ن ودياركر كو خواستا هه‌رێما كوردستانێ پێگيرى وبجهئينانا دستوورى يه وه‌كو رێ چاره بۆ ب ده‌ستڤه‌ئينانا سه‌قامگيريێ”.
ل دۆر شه‌رێ دژى تيرۆرێ، مه‌سرور بارزانى ئاماژه كر كو هێشتا مه‌ترسيا تيرۆرستان ل ده‌ڤه‌رێ يا ماى ول ڤێ دووماهيێ ژى چالاكيێن وان ل هنده‌ك ده‌ڤه‌ران په‌يدابووينه.
