جڤاتا وه‌زيران برياره‌كێ ل دۆر مووچێ شه‌هيدان دده‌ت
ئه‌ڤرۆنيوز:
جڤاتا وه‌زيرێن هه‌رێما كوردستانێ فه‌رمانا پێكئينانا لژنه‌كا بلند بۆ ڤه‌گۆهاستنا مووچێ كوسوكارێن شه‌هيدان بۆ سه‌ر به‌غدا ده‌ردكه‌ت، سه‌رۆكێ لژنێ ژى رادگه‌هينيت كو دپێنگاڤا ئێكێ دا دێ بزاڤێ كه‌ين مووچێ كوسوكارێن شه‌هيدان وئه‌نفالكريان وزيندانيێن سياسى بێخينه سه‌ر بودجا سيادى يا عيراقێ.
ئامانج ره‌حيم، سكرتێرێ جڤاتا وه‌زيرێن هه‌رێما كوردستانێ دبه‌رپه‌رێ خوه ل سه‌ر تورا جڤاكى يا فه‌يسبووكى به‌لاڤكر” ل گه‌ل محه‌مه‌د حاجى سالح وه‌زيرێ كاروبارێن شه‌هيدان وئه‌نفالكريان مژوولى به‌رهه‌ڤكرنا پرۆژێ يه‌كخستنا قانوون ورێنما ومووچێ كه‌سوكارێن شه‌هيدان وزيندانيێن سياسى ل گه‌ل هه‌ڤشێوێن وان ل به‌غدا ودێ پارێزه‌رێن ڤى پرۆژه‌ى بين”.
ژئاليێ خوه‌ڤه، محه‌مه‌د حاجى سالح، وه‌زيرێ كاروبارێن شه‌هيدان وئه‌نفالكريا ل هه‌رێمێ دداخۆيانيه‌كا رۆژنامه‌ڤانى دا گۆت” بريارا پێكئينانا لژنه‌كا بلند بۆ ڤه‌گوهاستنا مووچێ كه‌سوكارێن شه‌هيدان وئه‌نفالكريان وزيندانيێن سياسى بۆ سه‌ر حوكمه‌تا عيراقى ژئاليێ جڤاتا وه‌زيرێن هه‌رێما كوردستانێ هاتيه ده‌ركرن كو ئه‌و لژنه دێ ب سه‌رۆكاتيا وه‌زيرێ كاروبارێن شه‌هيدان وئه‌نفالكريان بيت وئه‌ندامه‌تيا رێڤه‌به‌رێ فه‌رمانگه‌ها هه‌ماهه‌نگيێ ودووڤچوونێ ل جڤاتا وه‌زيران ونوونه‌رێ وه‌زاره‌تا دارايى وئاليێن په‌يوه‌نديدار بيت”.
گۆت ژى” پشتى دياركرنا نوونه‌رێن وه‌زاره‌تان، لژنا ناڤبرى دێ كۆمبوونا خوه كه‌ت ب مه‌ره‌ما دانانا به‌رنامه‌كى كا چاوان وێ به‌حس ل گه‌ل جڤاتا وه‌زيرێن عيراقێ كه‌ين ودانوستاننێن جدى ژى دێ كه‌ين”.
وه‌زيرێ كاروبارێن شه‌هيدان وئه‌نفالكريان دياركر” ل ده‌ستپێكێ مه دڤێت ئه‌و مووچێ دهێته دان ب كه‌سوكارێن شه‌هيدان وئه‌نفالكريان وزيندانيێن سياسى بچيته سه‌ر بودجا سيادى يا حوكمه‌تا فيدرالى وپێنگاڤا مه يا دويێ دێ ئه‌و بيت كار بكه‌ين قانوون بهێنه رێكخستن ول هه‌موو عيراقێ ب ئێك شێوه بيت”.
