حه‌شدا شه‌عبى ب رێيا كارتێن ئه‌لكترۆنى يێن شنگاليێن چووينه ده‌رڤه سه‌خته‌كاريێ دكه‌ت
ئه‌ڤرۆنيوز:
به‌ربژاره‌كێ پارتى ديموكراتى كوردستان ل شنگالێ راگه‌هاند، حه‌شدا شه‌عبى ل شنگالێ رێگريێ ل به‌ربژارێن پارتى دكه‌ت بچنه شنگالێ وحه‌شدێ ل به‌ره ژى ب كارتێن ده‌نگدانێ يێن وان كه‌سێن چووينه ده‌رڤه‌ى وه‌لاتى سه‌خته‌كاريێ ئه‌نجام بده‌ت.
وه‌يس نايف، به‌ربژارێ هژمار 60 يێ ليستا 184 يا پارتى ل شنگالێ بۆ مالپه‌رێ فه‌رميێ پارتى گۆت” پشتى روودانێن 16 ئوكتۆبه‌رێ، ده‌زگه‌هێ شه‌رعى يێن مه نه‌شێن ڤه‌گه‌رن شنگالێ ونوكه ژى به‌ربژارێن پارتى نه‌شێن بچنه شنگالێ، هه‌روه‌سا 85% خه‌لكێ مه ئاواره‌نه وئه‌وێن ل وێرێ ژى ماين يێن دبن ده‌ستهه‌لاتا حه‌شدا شه‌عبى وله‌شكرێ عيراقێ دا، ئه‌وژى سه‌حدكه‌نه پارتى وه‌كو دوژمنه‌ك “.
گۆت ژى” ل شنگالێ نێزيكى 21 هزار ده‌نگده‌ر يێن هه‌ين وئه‌وێن دى يێن د كه‌مپان ڤه ورێگرى ل به‌ربژارێن مه دهێته كرن كو سه‌ره‌دانا ده‌نگده‌ران ل شنگالێ بكه‌ن، به‌لێ مه‌ترسيا هه‌ى كو حه‌شدا شه‌عبى سه‌خته‌كاريێ ب وان كارتێن ده‌نگدانێ بكه‌ت يێن كوردێن ئێزدى ئه‌وێن چووينه ده‌رڤه‌ى وه‌لاتى، چونكى ئه‌و هه‌موو بزاڤان دكه‌ن بۆ ئه‌نجامدانا سه‌خته‌كاريێ، هه‌رچه‌نده مه شيايه ب رێيا كۆمسيۆنێ هنده‌ك ژوان كارتان ڤه‌گۆهێزين، به‌لێ هێشتا پشكه‌ك ژ وان كارتان ل شنگالێ يێن ماين”.
وه‌يس نايف دياركر” خه‌لكێ شنگالێ پێشوازيه‌كا گه‌رم ل ليستا 184 يا پارتى دكه‌ن وچو ئاليه‌كێ دى ب به‌ديلێ پارتى نابينن، چونكى دزانن تنێ پارتى يه دشێت پرنسيبێ پێكڤه‌ژيانێ ل ده‌ڤه‌رێ زێده‌تر بچه‌سپينيت، له‌وما پتريا ده‌نگان بۆ ليستا پارتى يه”.
