شاندێ پارتى ڤه‌گه‌ريا كوردستانێ
ئه‌ڤرۆنيوز:
ئه‌ڤرۆ ئه‌ينيێ 25/5/2018 شاندێ پارتى ديموكراتى كوردستان ل به‌غدا ڤه‌گه‌ريا هه‌رێما كوردستانێ.
پشتى ئه‌نجامدانا پرۆسا هه‌لبژارتنێن جڤاتا نوونه‌رين عيراقێ ل 12 ڤێ هه‌يڤێ، مه‌كته‌با سياسى يا پارتى بريار دا بۆ دانوستاندنێ ل دۆر پێكئينانا حوكمه‌تا عيراقێ شانده‌ك بچيته به‌غدا.
ل رۆژا سێشه‌مبيا بۆرى شانده‌كێ پارتى ب سه‌رۆكاتيا فازل ميرانى سكرتێرێ مه‌كته‌با سياسى سه‌ره‌دانا به‌غدا كر ول گه‌ل لايه‌نێن سه‌ركه‌فتى دهه‌لبژارتنان دا وباليۆزێن وه‌لاتان كۆمبوو ودوى چارچۆڤه‌ى دا ديدارا ئێكێ ل گه‌ل موقته‌دا سه‌در ئه‌نجامدا وپاشى كۆمبوون ل گه‌ل هه‌ر ئێك ژ هادى عامرى، حه‌يده‌ر عه‌بادى، نورى مالكى، ئه‌ياد عه‌لاوى، ئوسامه نوجيفى، سالح موتله‌گ، عه‌مار حه‌كيم، خالد عوبه‌يدى، كازم شمه‌رى، عادل عه‌بدولمه‌هدى، حزبا شيوعى يا عيراقى وباليوزێ ئيرانێ وسه‌رۆكێ تائيفا مه‌سيحى كلدانى ل عيراقێ وجيهانێ وهژماره‌كا سه‌ركرده وپارت ولايه‌نێن دى يێن عيراقى ئه‌نجامدان.
هه‌ر ل به‌غدا شاندێ پارتى ل گه‌ل شاندێ ئێكه‌تيێ كۆمبوو ودانوستاندن ل دۆر بزاڤێن پێكئينانا حوكمه‌تا نوو يا عيراقێ كرن.
دوان هه‌موو ديدار وكۆمبوونان دا به‌حس ل پرۆسا هه‌لبژارتنان ل عيراقێ وره‌وشا پشتى هه‌لبژارتنان وهه‌روه‌سا بزاڤ وپێنگاڤێن بۆ پێكئينانا حوكمه‌تا نوو يا عيراقێ ل سه‌ر بنه‌مايێ سازانێ وهه‌ڤپشكيێ وبجهئينانا دستوورى وچاره‌كرنا كێشان هاته كرن.