ئەمریکا دڤێت مەسعود بارزانی سەرۆک کۆمار بیت
ئه‌ڤرۆ نيوز:
ژێدەرەکێ سیاسی یێ ئاگەھدار ئاشکراکر بۆ مالپەرێ دەنگۆباسێن (بەغداد ئەلیەوم) ئاشکراکر، ھێزێن سیاسی یێن کوردستانێ مژوولی پرۆژەکی بۆ بەلاڤکرنا پۆستێن سیاسی د ناڤبەرا ھەموو ئالیێن کوردستانی دا ب ھەرسێ پۆستێن سەرۆکاتیێ ڤە دورست بکەن، بۆ گرنتیکرنا ئێکگرتنا ھەلویستی کوردان، بەری چوونا بۆ بەغدا و گەنگەشەکرنا ھەڤپەیمانیا ل گەل حوکمەتا نوویا عیراقێ.
ژێدەرێ نەڤیای ناڤێ وی ئاشکرا بیت گۆت: ئەڤ پرۆژە ب سەرپەرشتیا ھەردو حزبێن سەرەکی یێن کوردستانی یە، پارتی دیموکراتی کوردستان و ئێکەتی نشتیمانی کوردستان، کو دبیت پۆستێ سەرۆک کۆمارێ عیراقێ ل گوڕ وێ رێککەفتنێ ھەکە ھاتە بجھئینان، ب مەرەما گرنتیکرن و ب ھێزکرنا رۆلێ مەزنێ کوردان ل بەغدایێ بۆ مەسعود بارزانی بیت.
ھەروەسا ژێدەرێ ئاگەھدار دیارکر، بارزانی بەری نوکە ئەو دەنگۆ چەندێن جاران رەتکریە کو حەزا وی ل سەر وەرگرتنا پۆستێ سەرۆک کۆماری ھەبیت، بەلێ ھندەک ژێدەرێن ناڤا پارتی گۆتیە: دشیاندایە رێککەفتنەکا بڤی رەنگی بھێتە ئەنجامدان، کو پۆستێ سەرۆکێ ھەرێما کوردستانێ بمینیت ھەلاویستی یان ژی بۆ کەسەکی ژ حزبا پارتی بیت، و ھەموو حزب و ئالیێن سیاسی ل سەر درازی بن، نەخاسمە حزبێن ئۆپۆزسیۆنێ، بەرامبەر پۆستێ سەرۆک کۆماری ب رێککەفتنا ھەموو حزبێن عیراقێ یێن سەرکەفتی.
زێدەباری وێ چەندێ ژی گۆت: دوێ رێککەفتنێ دا دبیت ئێکەتیێ ب ھندەک پۆستێن دیتر رازی بکەن، ھەمبەر دەستبەردانا ژ پۆستێ سەرۆک کۆمارێ عیراقێ، وەکی پۆستێ وەزارەتا ناڤخوەیی یان وەزارەتا پەترۆلێ، ھەروەسا ھندەک وەزارتێن گرنگ بۆ حزبێن بەرھنگار بھێنە دابنکرن، بڤی رەنگی قەیرانا سیاسی و نەرازیبوونا حزبێن بەرھنگار ل سەر ئەنجامێن ھەلبژارتنان ل ھەرێما کوردستانێ ب دووماھی بھێت.
ژێدەرێ ئاگەھدار ئاماژە دا وێ چەندێ ژی، ئەمریکا ل گەل حزب و ئالیێن ھەرێما کوردستانێ کومبوویە و گڤاشتن ل سەر ھەموویان ھاتینە کرن، بۆ ھندێ ئەو رێککەفتن سەربگریت و بەرنامەکێ تەمام بۆ نەھێلانا قەیرانا سیاسی ل ھەرێمێ بھێتە دنان، و سەردەمەکی نوو بھێتە رۆژەڤێ و رەوشا ناکوکیان ل ھەرێمێ ب دووماھی بھێت.