“بێی ھەرێما کوردستانێ پۆستێ سەرۆک وەزیرێن عیراقێ ئێکلا نابیت”
ئه‌ڤرۆ نيوز:
مامۆستایەکێ زانکۆیێ ئاماژە دا، نێچیرڤان بارزانی رۆلەکێ مەزن ھەیە ل سەر ئاستێ دەڤەرێ و کاریگەری ل سەر پڕۆسا سیاسیا عیراقێ ھەیە، ھەروەسا دیارکر، چو ھێزەک بێی ھەرێما کوردستانێ و پارتی نەشێت پۆستێ سەرۆک وەزیرێن عیراقێ ئێکلا بکەت.
دکتۆر سالح مەلا عومەر، مامۆستایێ زانکۆیێ بۆ رۆژناما ئەڤرۆ گۆت: بشێوەیەکێ گشتی پڕۆسا سیاسی گوھۆڕینێن بلەز تێدا دھێنەکرن، حەیدەر عەبادیێ نوکە ل گەل یێ بەری چەند ھەیڤانە و سالەکێ زۆر یێ جودایە، ھەر پشتی ئەنجامێن ھەلبژارتنێن پەرلەمانێ عیراقێ ھەلویستێ عەبادی ھاتیە گۆھۆڕین، چونکە عەبادی ب ھیڤیا وێ چەندێ بو دێ ھژمارەکا زۆرا دەنگان ل ھەلبژارتنێن 12ی ئەیارا بۆری ب دەستڤە ئینیت و ئەمریکا دێ پشتەڤانیا وی بکەت، بۆ وەرگرتنا پۆستێ سەرۆک وەزیرێن عیراقێ، بەلێ مەدیت پێگەھێ عەبادی بڤی شێوەی دناڤا وەلاتیێن عێراقێ دا نەبو، دەمێ بەرێ خوە ددەین رەوشا عیراقێ خۆنیشاندانێن نوکە تێنە کرن ل باشوورێ عیراقێ کاریگەری لسەر مەشروعیەتا حەیدەر عەبادی چێکریە، سەرەڕای ھندێ سەرۆک وەزیرێن عیراقێ وەسا ھزر دکر مەرجەعیەتێ بلندێ شیعەیان لپشتە، بەلێ رۆژا ئەینی مە دیت نوونەرێ عەلی سیستانی گۆت، ئەم دخوازین کەسەک ببیتە سەرۆک وەزیرێن داھاتیێ عیراقێ کەسەکێ بھێز بیت و دژی گەندەلیێ راوەستیت، بشێوەیەکێ نە ڕاستەوخۆ ئاماژە بوێ چەندێ کر، دێ کەسەکێ دی ل شوونا عەبادی پۆستێ سەرۆک وەزیران وەربگریت.
ل شەڕێ داعش سەرکەفتن بدەستڤە ئینایە و ل روویدانێن 16ی ئۆکتۆبەرێ دژی ریفڕاندۆما ھەرێما کوردستانێ راوەستیایە و دێ عیراقی پشتەڤانیا وی بکەن، بەلێ بەرۆڤاژی دەرکەفت نوکە عیراقیان عەبادی نەڤێت، پڕۆسا سیاسیا عیراقێ زۆرا لاوازە و ل سەرانسەری عیراقێ وەلاتیان پشکداری ھەلبژارتنێن بۆری دا نەکر رێژا پشکداریکرنێ نەگەھشتە 50%ێ ، ئەڤەژی نیشانا ھندێ یە خەلکێ باوەری ب سیاسەتمەدارێن بەغدا نەمایە و لایەنێن عیراقی پێدڤی ب پشتەڤانیا ھەرێما کوردستانێ ھەیە بۆ پێکئینانا حوکمەتا نوویا عیراقێ و چو کەسەک نەشێت بێی رازیبوونا ھەرێما کوردستانێ پۆستێ سەرۆک وەزیران وەربگریت، بتیابەتی دناڤا ھەرێما کوردستانێ پارتی سەنگا خوە ھەیە و ھژمارەکا زۆرا کۆرسیێن پەرلەمانی بدەستڤە ئینایە.
دکتۆر سالح مەلا عومەر گۆت: نێچیرڤان بارزانی کەسایەتیەکێ کاریزمایێ مەزنە ل ھەرێما کوردستانێ لسەر ئاستێ عیراق و دەڤەرێ کاریگەریێن زۆر لسەر پڕۆسا سیاسیا عیراقێ و ھەرێما کوردستانێ ھەیە، پشتی روویدانێن 16ی ئۆکتۆبەرێ کو گڤاشتنێن زۆر لسەر ھەرێما کوردستانێ ھەبوون نێچیرڤان بارزانی ب کاریزمایا خوە شیایە پەیوەندیەکا باش دگەل ولاتێن جیھانێ پەیداکەن و بەرژەوەندیێن وەلاتیێن ھەرێما کوردستانێ بھێنە دابینکرن و پڕۆسا سیاسی ل عیراقێ و ھەرێما کوردستانێ بھێتە راستڤەکرن، لەوڕا نێچیرڤان بارزانی سەنگا خوە ھەیە بۆ چارەسەرکرنا ئاریشەیان و بەرەف پێشبرنا ھەرێما کوردستانێ.