ئێدی پارێزه‌رێن كوردستانێ دشێن ل هەموو پارێزگەهێن عیراقێ كار بكه‌ن
ئەڤرۆ نیوز ، زنار تۆڤی:
نەقیبێ سەندیکا پارێزەرێن کوردستانێ دیارکریە، پشتی وان ل 22 تەمۆزێ داخوازەکا فەرمی ئاڕاستەی جڤاتا بلند یا دادوەری ل عیراقێ کری بۆ کارکرنا پارێزەرێن هەرێمێ و دەڤەرێن دیتر یێن عیراقێ ل سەرانسەری عیراقێ داخوازیا وان هاتیە پەسەند کرن.
بەختیار حەیدەر نەقیبێ سەندیکا پارێزەرێن کوردستانێ بۆ دوارۆژ گۆتیە، داخوازیا مە بۆ هندێ بوو،کو پارێزه‌رێن هەردوولا بشێن ل سەرانسەری عیراقێ دا کار بکەن، د ئه‌نجامدا بێ کێشە داخواز یا مە هاتە جێبەجێکرن.
گۆت ژی ب فەرمی ل 2 تەباخێ، جڤاتا بلند یا دادوەریێ ل عیراقێ، بەرسڤا مە دایە و رێککەفتنا دناڤبەرا سەندیکا پارێزەرێن کوردستانێ و عیراقێ، بۆ کارکرنا پارێزەرێن ئەندام د هەردو سەندیکا دا ل هەموو عیراقێ پەسەند کر، ئەو نڤێسین ژی دێ ب سەر دادگەهێن تێهەلچوونا فیدرال دا هێتە گشتاندن.
هەروەسا گۆتیە ژی، ژ نوکە وێڤە پارێزەرێن هەرێما کوردستانێ دشێن ل هەموو دادگەهێن دیتر یێن عیراقێ کاربکەن و ب هەمان شێوە ژی پارێزەرێن دەڤەرێن دیتر یێن عیراقێ دشێن ل کوردستانێ و ل هەموو دادگەهان کار بکەن بێی پەیدابوونا هیچ کێشە و بەربەستەکێ.
