١٥ بیرێن ئاڤێ ژ لایێ کەسێن نەنیاسڤە ل شنگالێ دھێنە تێکدان
دھۆک، لەزگین جوقی:
موختارێ گوندێ گوھبەل ل قەزا شنگالێ بۆ ئەڤرۆ نیوز دیار کر کو ھندەک کەسێن نەنیاس ب شەڤێ دھێن و بیرێن ئاڤێ یێن وەلاتیان خراب دکەن ھەتا نوکە ١٥ بیرێن ئاڤێ یێن ھاتینە خرابکرن و سۆتن.
شێخ عومەر عەجاج، موختارێ گوندێ گوھبەل ل قەزا شنگالێ دیار کر کو عەرەبێن زڤڕینە سەر گوندێن خوە ب رەخ گوھبەل ڤە گەفان ل ئێزدیان دکەن و ناھێلن خەلکێ مە کارێن خوە یێن چاندنێ ئەنجام بدەن، ب تنێ ئێڤاریا دوھی پێنج بیستان و خانیێن پلاستیکی یێن جۆتیارێن گوھبەل ھاتینە سۆتن و گەلەک زیان یێن گەھشتینە جۆتیار و خەلکێ گوندێ گوھبەل د ڤان رۆژێن بۆری دا ھەتا نوکە ١٥ بیرێن ئاڤێ یێن ھاتینە تێکدان و خرابکرن و سۆتن ئەو بیرێن ئاڤێ ژ لایێ وەلاتیان ڤە ھاتبوونە چێکرن بۆ ئاڤدانا باغ و بستانان.
ئەو ژی دیار کر کو پشتی سۆتنا دەخل و دانی، نوکە دەست ب سۆتنا باغ و بیستان و خانیێن پلاستیکی و خرابکرنا بیرێن ئاڤێ یێن خەلکێ گوھبەل ھاتیە کرن و ھەتا نوکە ھیچ ھەڤکاری بۆ خەلکێ زیان گەھشتینێ ل گوندێ گوھبەل نەھاتیە کرن.
