ئه‌ڤرۆ سال رۆژا جینوسایدا بارزانیان دێ هێته ساخكرن
ئه‌ڤرۆ نیوز، نه‌وزاد هلۆرى:
ب مه‌ره‌ما رێزگرتن ل خه‌بات و قوربانیدانا قوربانیێن جینوسایدا بارزانیان لسه‌ر ده‌ستێ رژێما به‌عس، وه‌زاره‌تا كاروبارێن شه‌هید و ئه‌نفالكریان ب هه‌ڤكارى ل گه‌ل دام و ده‌زگه‌هێن ده‌ڤه‌را بارزان دێ رابیت ب ساخكرنا سالرۆژا جینوسایدكرنا بارزانیان ل گوندێ بارزان.
رێبوار بارزانى، رێڤه‌به‌رێ كاروبارێن شه‌هید و ئه‌نفالكریێن بارزان بۆ ئه‌ڤرۆ نیوز گۆت: (چه‌ند روژه به‌رهه‌ڤى دهێنه‌كرن بو ساخكرنا 36 سالیا جینوسایدا 8000 بارزانیان كو ب ره‌نگه‌كێ هوڤانه ل بیابانێن باشوورێ عیراقێ ژلایێ رژێما به‌عس ب ساخى هاتینه بن ئاخكرن).
زێده‌تر گۆت: (رێورسم ب به‌رهه‌ڤبوونا هژماره‌كا كه‌ساتیێن كوردستانێ دێ ده‌مژمێر 4:30 ل سه‌ر گورستانا جینوسایدا بارزانیان ل گوندێ بارزان ژلایێ وه‌زاره‌تا كاروبارێن شه‌هید و ئه‌نفالكریان ب هه‌ڤكاریا دام و ده‌زگه‌هێن ده‌ڤه‌را بارزان ب رێڤه‌چیت و تێدا كومه‌كا چالاكى و گوتار و تاجه گولان هێنه پێشكێشكرن).
