ژڤانێ ده‌ستپێكرنا ئێكه‌م ئوڤه‌رپاسێن دهۆكێ هاته دياركرن
ئه‌ڤرۆ ، ره‌وان نهێلى:
بڕیاره ڤێ دوشه‌مبيێ كومپانیا كاڤین گرۆپ ده‌ست ب چێكرنا پرۆژێ ئه‌نده‌رپاسا فه‌رماندا دهۆك ل سه‌ر جادا بارزان بكه‌ت كو ل دووڤ گوتنا رێڤه‌به‌رێ پرۆژه‌ى، دێ د ماوێ شه‌ش هه‌یڤان دا ئه‌و ئه‌نده‌رپاسه هێته تمامكرن.
ئه‌ندازیار كانیوار جبرائیل رێڤه‌به‌رێ پرۆژێ ئه‌نده‌رپاسا فه‌رماندا دهۆك ل سه‌ر جادا بارزان بۆ ئه‌ڤرۆ نيوز دیاركر، رۆژا ئێكشه‌مبێ دێ ل گه‌ل رێڤه‌به‌ریا هاتن و چوونا پارێزگه‌ها دهۆك كۆم بین، ب مه‌ره‌ما وێ یه‌كێ ئالیه‌ته‌ك بهێته دانان كو ئه‌م بشێن ده‌ست ب پرۆژێ خوه بكه‌ین و گۆت” بڕیار ئه‌وه رێیا جادا بارزان، ده‌مێ شوفێر ل دهۆكێ ده‌ردكه‌ڤیت، ل نێزیك رێڤه‌به‌ریا وه‌به‌رهێنانا دهۆك، تاوه‌كو دگه‌هیته پانزیخانا بهار ستى، ئه‌و رێیه بهێته گرتن و شوفێر هاتن و چوونێ ل جادا خزمه‌تگوزارى بكه‌ن، و بڕیاره دوشه‌مبيێ ئه‌و رێ بهێته گرتن و ده‌ست ب پرۆژه‌ى بكه‌ین”.
ئه‌ندازیار كانیوار جبرائیل رێڤه‌به‌رێ پرۆژێ ئه‌نده‌رپاسا نێزیك فه‌رماندا دهۆك ئاماژه ب وێ یه‌كێ دا ” ئه‌گه‌ر چو ئاریشه بۆ وان په‌یدا نه‌بن و سه‌قا یێ دژوار نه‌بیت، مه شه‌ش هه‌یڤ بۆ ڤى پرۆژه‌ى داناینه كو ب دووماهى بهێت و ل هه‌مبه‌ر شوفێران بهێته ڤه‌كرن، ژبه‌ر كو مه بریار دایه 24 ده‌مژمێران كار بكه‌ین ژ پێخه‌مه‌ت له‌زكرن ل بجهئینانا پرۆژه‌ى و به‌رى ماوێ خوه ب دووماهى بهێت”.
ل رۆژا 7/7/2019 ل كوچكا پارێزگه‌ها دهۆك، فه‌رهاد ئه‌ترووشى پارێزگه‌رێ دهۆكێ، پێنج پرۆژێن ستراتیژى بۆ باژێرێ دهۆكێ راگه‌هاندن كو پێكدهێن ژ هه‌ر پێنج پرۆژه ژ ئاليێ كومپانيا كاڤين گرۆپ ڤه دهێته بجهئينان :
1- پرۆژێ چێكرنا ئه‌نده‌ر پاسا مزگه‌فتا ئیمام حه‌مزه كو نوكه ب مزگه‌فتا شه‌هیدان هاتیه ناڤكرن و ته‌له‌فزیونا دهۆك ل سه‌ر جادا بارزان
2- پرۆژێ ئه‌نده‌ر پاسا نێزیك فه‌رماندا دهۆك ل سه‌ر جادا بارزان
-3 پرۆژێ چێكرنا ئه‌نده‌رپاسا نێزیك ناڤجیا سه‌فین ل سه‌ر جادا بارزان
-4 پرۆژێ تمامكرنا جادا كه‌مه‌رێ ب درێژاهیا 1505 كم ل كه‌رتێ 85 نزاركێ كو ده‌ست ب پرۆژه‌ى هاتيه كرن
-5 پرۆژێ ڤه‌كرن و قێركرنا جادا خزمه‌تگوزاریا جادا بارزان ، لایێ باشوور ب درێژاهیا 3500 م كو ده‌ست ب پرۆژه‌ى هاتيه كرن.