بەرپرسەکێ پارتی: عێراقێ پێدڤی ب ھێزەکا نیشتیمانی ھەیە
ئەڤرۆ نیۆز، قائید میرۆ:
لڤینێن داعشێ مەترسی بۆ سەر وەلاتیێن ھژمارەک دەڤەرێن عێراقێ پەیداکریە و ئەندامەکێ جڤاتا سەرکردایەتیا پارتی ژی ئاماژەکر، عێراقێ پێدڤی ب ھێزەکا نیشتیمانی ھەیە بۆ بەرھنگاربوونا داعشێ.
دیاری حوسێن، ئەندامێ جڤاتا سەرکردایەتیا پارتی بۆ ئەڤرۆ نیۆز دیارکر” ئاریشا سەرەکیا عێراقێ ژلایێ ئەمنی و سەربازی ڤە نەبوونا ھێزە کا نیشتیمانیە، مخابن ھێزێن نوکە ل عێراقێ ھەی زێدەتر مەزھەبینە نەک نیشتیمانی و ھەر ئێک ژوان گرێدایی ھێزەکا سیاسی و مەزھەبیە نەک وەلاتیێن عێراقی بپارێزن.
ئەڤی بەرپرسێ پارتی گۆتژی” چەکدارێن داعش ل زۆربەیا دەڤەرێن عێراقێ خوە بەرھەڤکرینە بۆ ئەنجامدانا کریارێن تیرۆرستی و بەردەوام ل دەلیڤەکێ دگەڕن بۆ لێدانا ھێزێن ئەمنی .
دیاری حوسێن ئاشکراکر” پێدڤیە ھێزێن پێشمەرگەی بھێنە ڤەگەڕاندن بۆ دەڤەرێن کوردستانی و بێی ھەبوونا ھێزا پێشمەرگەی ئەم باوەرناکەین دەڤەر تەناھیێ بخۆڤە ببینیت، ب تایبەتی پشتی ڤەکێشانا ھێزێن ئەمریکی ل ھژمارەکا دەڤەرێن عێراقێ.