وێنه‌گره‌ك: چو جاران بێى كامیره ژ مال ده‌رناكه‌ڤم
ئه‌ڤرۆ نیوز ، زنار تۆڤى:
وێنه‌گر عیسام سه‌یدوش، خه‌لكێ زوماره و هه‌ر ژ سالا 1991 هه‌تا نوكه ل وه‌لاتێ دانیمارك دژیت، د دیداره‌كێ دا بۆ ئه‌ڤرۆ نیوز دیار كر: وى په‌یمانگه‌ها مولتى مه‌دیا ل وه‌لاتێ دانیمارك خواندیه، ل سالا 2007 وى ب ره‌نگه‌كێ پرۆفشنال كارێ وێنه‌گرتنێ كریه، هه‌ر چه‌نده ل سالێن هه‌شتیان ل سه‌دێ بورى وى كارێ وێنه‌گرتنێ كریه، هه‌روه‌سا چو جاران بێى كامیره ئه‌و ژ مال ده‌رناكه‌ڤیت و هه‌رده‌م كامیره ل گه‌ل وى یه، دیسان بۆ كارێ وێنه‌گرتنێ ئه‌و چوویه وه‌لاتێن پۆلونیا، سویسرا، فره‌نسا، هۆله‌ندا، به‌لجیكا، ئه‌لمانیا، سوید و ئایسله‌ند ل ئورۆپا.
ناڤهاتى گۆت ژى: وى سێ جاران سه‌ره‌دانا كوردستانێ كریه، لێ وى چو وێنه ل كوردستانێ نه‌گرتینه، هه‌ر چه‌نده وى بزاڤ كرینه و د پلانا وى دا هه‌یه، كو سه‌ره‌دانا كوردستانێ بكه‌ت و وێنێن سرۆشتێ كوردستانێ به‌لاڤ بكه‌ت، هه‌رده‌م ئه‌و ل ده‌ڤه‌رێن زۆزان و چیایان وێنان دگریت، ل گه‌ل ڤى كارى چار سالان وى كارێ پێشمه‌رگاتیێ ژى كریه، ب تنێ ئه‌و وێنێن سرۆشتى دگریت، وى چه‌ندین وێنه ل سایتێن جیهانى یێن ناڤدار به‌لاڤ كرینه و گه‌له‌ك جاران ژى وێنێن وى بووینه یێن ئێكێ و وى چه‌ندین خه‌لات ژى ل سه‌ر ئاستێ جیهانێ وه‌رگرتینه.
عیسام هێشتا دبێژیت ژى: ئه‌ز گه‌له‌ك یێ ب سرۆشتى ڤه هاتیمه گرێدان، ئه‌ز خۆشیه‌كا تایبه‌ت ژ كارێ وێنه‌گرتنێ ژى دبینم، دیسان من لبه‌ره بهێمه كوردستانێ و ب رێیا چاڤكێ كامیرا خوه سرۆشتێ جوانێ وه‌لاتێ خوه نیشا هه‌موو جیهانێ بده‌م، ژ پێخه‌مه‌ت بزانن كو كوردستان خودان سرۆشته‌كێ جوان و ره‌نگینه.
