بكوژێ وى هه‌ڤژينا وى و برايێ وى بوون
ئەڤرۆ نيوز، نيوار محه‌مه‌د سه‌ليم:
بەرپرسێ پەیوەندی و راگەھاندنا پۆلیسێن پارێزگەھا دھۆکێ بۆ ئه‌ڤرۆ نيوز راگه‌هاند كو پشتى ل رۆژا 10-2-2015 ل کۆمەلگەھا رزگاری زەلامەکێ 41 سالی ب ناڤێ (س،م ،ا) ل دەمژمێر سێی شەڤێ د حەوشا مالا خوە دا ب گوللەکا دەبانجێ ھاتیە کوشتن، ئێكسه‌ر ئه‌و ل جهێ روودانێ ئاماده ببوون، به‌لێ ل وى ده‌مى ته‌رمێ وى بۆ نوشداريا داد هاتبوو هنارتن.
رائيد هێمن سلێمان گۆت: “ئه‌م وه‌كو پۆليس شياين گۆمانلێكريان د ماوێ كێمتر ژ 24 ده‌مژمێران دا ده‌سته‌سه‌ر بكه‌ين و پاشان دان ب تاوانا خوه كر كو ئێك ژ وان هه‌ڤژينا وى بوو و يێ دويێ ژى برايێ وى بوو”.
رائيد هێمن سلێمان ئاماژه ب وێ چه‌ندێ ژى كر كو ئەڤ کەسە خێزاندار بوو و پێنچ زارۆ ژى هه‌بوون و ئه‌گه‌رێ كوشتنێ ژى بۆ كێشه‌كا خێزانى ڤه‌گه‌راند و گۆت: “هه‌ڤژينا وى و برايێ وى هه‌ردو د ژيێ د ناڤبه‌را 30 هه‌تا 35 ساليێ دا بوون”.
