ئیران ھێزێن خوە ژ سووریێ ڤەناکێشیت
ئەڤرۆ:
جێگرێ وەزیرێ دەرڤە یێ ئیرانێ راگەھاند کو ئەو ب چو رەنگەکێ ھێزێن خوە ژ سووریێ ڤەناکێشن و ل سەر داخوازا حوکمەتا سووریێ دێ ل وی وەلاتی مینن و چاڤدێرەکێ سیاسی ژی دیار دکەت کو ھەلویستێ ئیرانێ دێ بیتە ئەگەرێ ئالۆزیێن نوو ل دەڤەرێ.
عەلی ئەسغەر حاجی جێگرێ وەزیرێ دەرڤە یێ ئیرانێ د داخۆیانیەکێ دا بۆ ئاژانسا سپوتینگ یا نووچەیان راگەھاند کو ھێزێن وان ل سەر داخوازا حوکمەتا سووریێ ل وی وەلاتی جێگر بووینە و د شەرێ ل دژی تیرۆرستان دا رۆلەکێ بەرچاڤ گێراینە و گۆت: (ئارمانجا سەرەکی یا ئیرانێ ل سووریێ ئەو بوویە دا شەرێ داعشێ و گرۆپێن دی یێن تیرۆرستی بکەت، لێ مخابن د ماوەیێ دو سالێن بۆری دا ئیسرائیلێ گەلەک جاران ھێرشی ھێزێن ئیرانێ کریە و ھەکە ئیسرائیل ل سەر ھەلویستێ خوە یێ نھا بەردەوام بیت ئیران دێ ب توندی بەرسڤا ئیسرائیلێ دەت).
ناڤھاتی ئەو یەک ژی دیار کر کو دڤێت ھەموو ھێزێن بیانی یێن کو بێی رازیبوونا شامێ چووینە سووریێ ئاخا وی وەلاتی بجە بھێلن، چونکو ئەمریکا و وەلاتێن دی دخوازن ئاخا سووریێ پارچە بکەن و ئیران بۆ ئارامیا ل سووریێ کار دکەت و گۆت: (ھەر دەمێ رەوشا سووریێ ئارام بوو و شامێ داخواز ژ مە کر کو ئەم ھێزێن خوە ژ سووریێ ڤەکێشین وی دەمی دێ ھەموو ھێزێن خوە ژ سووریێ ڤەکێشین لێ ھەتا رەوشا سووریێ یا ئالۆز بیت دێ ھێزێن مە ل ئاخا وی وەلاتی مینن).
د ڤێ دەربارێ دا ئەکبەر گەنجی سیاسەتمەدارێ ناڤدارێ ئیرانی راگەھاند کو دەستھەلاتا نھا دڤێت پرسێن ناڤخوەیی و قەیرانا دارایی ژ بیرا خەلکی ببەت و ژ بەر ھندێ ژی بەردەوام بەحسێ ئالۆزیێن ل دەڤەرێ و شەرێ ل دژی تیرۆرستان دکەت، د بنەمایێ خوە دا ئیران بوویە ئەگەرێ ئالۆزبوونا رەوشا سووریێ، عیراقێ و گەلەک وەلاتێن دی، ب جھێ ھندێ کو بەرپرسێن ئیرانێ د خەما عیراقێ و سووریێ دا بن باشترە کو چارەسەریەکێ بۆ رەوشا نھا یا ناڤخوەیی ببینن، چونکو ژ بەر شاشیێن د سیاسەتا دەرڤە دا ب سالانە ئەمریکا سزایێن گران ل سەر ئیرانێ سەپاندینە و نھا ژیانا وەلاتیان گەلەک خرابە، لێ مخابن بەرپرسێن ئیرانێ د خەما خەلکێ خوە دا نینن و گۆت: (ئیسرائیلێ ھەتا نھا ل سووریێ دربێن گەلەک مەزن ل ئیرانێ داینە و ب سەدان ئەفسەر و سەربازێن ئیرانێ ل سووریێ ھاتینە کوشتن، چەندین ملیار دۆلار پارە ئیرانێ ل سووریێ مەزاختینە و ھەتا نھا ژی چو ئەنجامەکێ خوە نەبوویە، ھەکە ئیرانێ ئەو پارە بۆ باشترکرنا رەوشا خوە یا ئابووری مەزاختبا دا گەلەک ئاریشێن ئابووری یێن وەلاتیان ھێنە چارەسەرکرن، ژ بەر ھندێ ژی گرنگە بەرپرسێن ئیرانێ پێداچوونێ د سیاسەتا خوە ل سووریێ و رۆژھەلاتا ناڤین دا بکەن).
ناڤھاتی ئەو یەک ژی دیار کو کو روسیا ب ھەموو رەنگەکێ ل دژی ھەبوونا ھێزێن ئیرانێ ل سووریێ یە، بەری نھا ژی گەلەک جاران بەرپرسێن روسیا داخواز ژ ئیرانێ کرینە کو ھێزێن خوە ژ سووریێ ڤەکێشن.
ئەو یەک د دەمەکێ دایە کو حەفتیا بۆری بەرپرسەکێ سەربازی یێ ئیسرائیلێ ژی راگەھاند کو ھەتا ھێزێن ئیرانێ ل سووریێ بن ئەو دێ بەردەوام ھێرشی وان کەن، چونکو ئیرانێ دڤێت ئاخا سووریێ ل دژی ئیسرائیلێ بکار بینیت و ئەو یەک ژی ب چو رەنگەکێ ناھێتە قەبوولکرن.
