ب کوژمێ پتری 8 ملیار دیناران دێ بەرێ بنیاتی بۆ هژمارەکا پرۆژان ل قەزا ئامێدیێ ھێتە دانان

ئەڤرۆ نیوز:

ب مەرەما زێدەتر خزمەتکرنا خەلکی و گەھاندنا خزمەتگۆزاریێن زێدەتر بۆ قەزا ئامێدیێ، ئەڤرۆ سێشەمبی ١٣/٤/٢٠٢١ (پ.د. عەلی تەتەر) پارێزگەرێ دھۆکێ دێ بەرێ بنیاتی بۆ هژمارەکا پرۆژێن خزمەتگۆزاری ب کوژمێ پتری ھەشت ملیار دیناران ل وێ قەزایێ دانیت.

مللەت عسمەت، سکرتێرێ رۆژنامەڤانیێ پارێزگەرێ دھۆکێ بۆ ئەڤرۆ نیوز دیار کر، ئەڤرۆ سێشەمبی، پارێزگەرێ دھۆکێ دێ ب کوژمێ ھەشت ملیار و ٦٤٢ ملیۆن دیناران بەرێ بنیاتی بۆ ١٦ پرۆژێن خزمەتگۆزاری ل سنۆرێ قەزا ئامێدیێ دانیت، ژ وان ژی دێ بەرێ بنیاتی بۆ پرۆژێ ستراتیژی یێ گەھاندنا ئاڤێ ژ ئێنیشکێ بۆ ناحیا بامەرنێ دانیت، دێ بەرێ بنیاتی بۆ چێکرنا رێکێن ناڤخۆ ل سەنتەرێ ناحیا سەرسنکێ ب درێژاھیا دو ھزار و ٦٩٣ مەتران و بەرفرەھکرنا جادا سەرەکی یا دەرگەھێ وێ ناحیێ ھێتە دانان، دیسان دێ بەرێ بنیاتی بۆ چێکرنا جادێن ناڤخۆ ل تاخێ ئازادی ل کۆمەلگەھا قەدشێ ھێتە دانان، لدووڤدا دێ بەرێ بنیاتی بۆ سەبکرنا جاددێن ناڤخۆ ژی ل کومەلگەھا قەدشێ و بەرفرەھکرنا جادا سەرەکی یا د ناڤ کومەلگەھا ناڤھاتی دا و چێکرنا رێکێن ناڤخۆ ل (ئێنیشکێ و ئامێدیێ و مرێبکا و بانیا و مێرستەکی) ھێتە دانان، ھەروەسا دێ بەرێ بنیاتی بۆ نووژەنکرنا ئاڤاھییێ رەوشەنبیری و لاوان و گوھارتنا وی بۆ ئاڤاھیێ پاسپۆرتان ل قەزا ئامێدیێ ھێتە دانان.

ناڤهاتی گۆت ژی، دێ بەرێ بنیاتی بۆ چێکرنا تۆرا ئاڤێ یا تاخێن شەھیدان و دارستان و گوندێ بەلاڤە و تاخێ گولان ئێک ل دێرەلوکێ و پرۆژێ تورا ئاڤێ ل گوندێ بەرچی و سەخبێرکرنا رێیکێن تاخێ داستان و دانانا سولینا پایپ و قێرکرنا رێکێن ناڤخۆ ل تاخێن داستان و ئازادی و چێکرنا رێیا چەلکێ ھێتە دانان، ھەروەسا دێ بەرێ بنیاتی بۆ پرۆژێ چێکرنا خەزانەکا ئاڤێ ل تاخێ گولان و دگەل گەھاندنا ھێلا سەرەکی (٥٠٠) ملم بۆ خەزانێ و پرۆژێ قێرکرن و سەبکرنا جادا شێلادزێ ل تاخێ قەندیل و چێکرنا رێیا حەفت گوندێ دەڤەرا زێباریا ژ (لاتکا) ھەتا (ھلۆرا) و سەخبێیا رێیا دێوکی – ھلۆرا ب درێژاھیا (٨,٨)کم ھێتە دانان.

هێشتا دبێژیت، هەر ئەڤرۆ دێ بەرێ بنیاتی بۆ پرۆژێ چێکرن و قێرکرنا رێیێن ناڤخۆ ل شێلادزێ و پرۆژێ چێکرن و قێرکرنا رێکێن ناڤخۆ ل سیریێ و شێلادزێ ب درێژاھیا (٤,٠٤٩) کم و پرۆژێ چێکرنا سولینا سندوقی ل تاخێ ئازادی ب درێژاھیا (٣٠٠) مەتران و پرۆژێ چێکرن و قێرکرنا رێیێن ناڤخۆ دگەل سولینەکا ئاڤێ ل تاخێ ملی مەیدانێ ھێتە دانان.