ئه‌ندامه‌كێ په‌رله‌مانێ توركیا:روسیا دشێت گه‌له‌ك كارتێن ب هێز ل دژی توركیا بكار بینیت
ئه‌ندامه‌كێ په‌رله‌مانێ توركیا راگه‌هاند كو توركیا شیایه هه‌تا نها مفایه‌كا باش ژ ئالۆزیێن د ناڤبه‌را روسیا و ناتۆ دا وه‌ربگریت لێ ده‌مه‌كه په‌یوه‌ندیێن روسیا و توركیا ئالۆز بووینه و روسیا گه‌له‌ك كارتێن ب هێز ل دژی توركیا د ده‌ستان دا هه‌نه.
هشیار ئۆزسۆی ئه‌ندامێ په‌رله‌مانێ توركیا سه‌ر ب فراكسیۆنا هه‌ده‌پێ ل په‌رله‌مانێ توركیا به‌حسێ ئالۆزیێن ڤێ دووماهیێ یێن د ناڤبه‌را توركیا و روسیا دا كر و راگه‌هاند كو ده‌مه‌كه توركیا به‌حسێ مافێ خه‌لكێ تاتارستانێ و هه‌روه‌سا هه‌رێما قرمێ دكه‌ت و ئه‌و یه‌ك ژی بۆ ئه‌گه‌رێ هندێ كو هه‌م وه‌زیرێ ده‌رڤه یێ روسیا و هه‌م ژی وه‌زاره‌تا به‌ره‌ڤانیێ یا وی وه‌لاتی ب توندی هۆشداریێ بده‌نه توركیا و هه‌تا ب ره‌نگه‌كێ نه‌راسته‌وخوه سیرگێی لاڤرۆڤ به‌حسێ هندێ كر كو ل توركیا پرسا كوردی هه‌یه و ئه‌و دشێن وی بابه‌تی ل دژی توركیا بكار بینن و گۆت: (توركیا هه‌تا نها شیایه مفایه‌كا باش ژ ئالۆزیێن د ناڤبه‌را روسیا و ناتۆ دا وه‌ربگریت، لێ پشتی كو ئیدارا جۆ بایدن ب فه‌رمی ده‌ست ب كارێ خوه كر ئێدی ئه‌و سه‌رده‌م نه‌ما، چونكو جۆ بایدن و ئیدارا نوو یا ئه‌مریكا رێ ناده‌ن توركیا ژ ئالیه‌كێ وه‌كو ئه‌ندامه‌كا ناتۆ كار بكه‌ت و ل ئالیێ دی ب چه‌كێ روسی ببیته مه‌ترسی بۆ ئه‌مریكا و ئه‌ندامێن ناتۆ، ژ به‌ر هندێ ژی نها توركیا گه‌له‌ك ته‌نگاڤ بوویه و دڤێت بریارا خوه بده‌ت).
ناڤهاتی ئه‌و یه‌ك ژی دیار كر كو روسیا دشێت هه‌موو هێزێن توركیا ژ سووریێ ده‌رخینیت و هه‌روه‌سا روسیا دشێت وه‌سا بكه‌ت كو توركیا نه‌چار بیت هێزێن خوه ژ لیبیا ژی ده‌رخینیت، دیاره روسیا ب ره‌نگه‌كێ نه‌راسته‌وخوه به‌حسێ بابه‌تێ كوردان ژی كریه، چونكو روسیا ژی وه‌كو گه‌له‌ك وه‌لاتێن دی دشێت پرسێن ناڤخوه‌یی یێن توركیا ب تایبه‌تی ژی پرسا كوردی ل دژی توركیا بكار بینیت و گۆت: (ب كورتی دیاره روسیا گه‌له‌ك كارتێن ب هێز د ده‌ستان دا هه‌نه كو دشێت ل دژی توركیا بكار بینیت و د هه‌مان ده‌می دا توركیا ئه‌و هێز و شیان نینن كو بشێت ل دژی روسیا راوه‌ستیت، ژ به‌ر هندێ ژی توركیا د ماوه‌یێ چه‌ند رۆژێن بۆری دا گۆتارا خوه یا ل دژی روسیا سه‌باره‌ت ب مافێ خه‌لكێ تاتار و هه‌رێما قرمێ نه‌رم كریه).
ئه‌ندامێ په‌رله‌مانێ توركیا ئه‌و یه‌ك ژی دیار كر كو سیسته‌مێ مۆشه‌كی یێ روسیا ژی ئێكه ژ كارتێن دی یێن ب هێز ل دژی توركیا، چونكو روسیا هه‌ر ده‌مێ بڤێت دشێت وی سیسته‌می بده‌ته راگرتن و نه‌هێلیت كار بكه‌ت، توركیا ژی باش دزانیت، د راستی دا نها به‌رپرسێن توركیا دخوازن بابه‌تێ موشه‌كێن روسیا وه‌كو كارته‌كێ ل دژی ئه‌مریكا و وه‌لاتێن دی یێن ئه‌ندامێ ناتۆ بكار بینن و وان نه‌چار بكه‌ن كو سیسته‌مێ به‌ره‌ڤانیێ یێ پێشكه‌فتی بده‌نه توركیا، لێ ئێدی باوه‌ریا وان وه‌لاتان ب توركیا نه‌مایه و گۆت: (توركیا نها پتر ژ هه‌ر ده‌مه‌كێ د ناڤبه‌را روسیا و ناتۆ ل گه‌ل ئه‌مریكا دا ته‌نگاڤ بوویه و دڤێت ئه‌ردۆگان بریارا خوه یا دووماهیێ بده‌ت، چونكو ئێدی نه‌شێت وه‌كو جاران مفای ژ ناكۆكیێن د ناڤبه‌را روسیا و ناتۆ دا وه‌ربگریت).
ئه‌و یه‌ك د ده‌مه‌كێ دایه كو حه‌فتیا بۆری سیرگێی لاڤرۆڤ وه‌زیرێ ده‌رڤه یێ روسیا ب ره‌نگه‌كێ ئاشكرا هۆشداری دا توركیا كو ده‌ستێوه‌ردانێ د كاروبارێن ناڤخوه‌یی یێ روسیا دا نه‌كه‌ت، چونكو روسیا ژی دشێت گه‌له‌ك كارتان ل دژی توركیا بكار بینیت.
