ڤيديۆ: ژنه‌كا ژ ده‌ستێ داعش ره‌ڤى به‌حسا خوه دكه‌ت
ئه‌ڤرۆ نيوز، شه‌وكه‌ت محه‌مه‌د سالح:
حەنان کچەکا سوریە و ل دەسپێکێ داخوازا لێبورینێ دکەت ژ بەر روندکێن ژ چاڤا دهێن چونکو دەمێ ھندەک بیرھاتنێن گەل داعش دهێنە بیرێ نەشێت خوە بگریت و دکەتە گری.
حەنان ژیێ وی ٢٦ سالە و نوکە ل وەلاتێ تورکیا دژیت بۆ پاراستنا کەس و کارێن خوە ل رۆژھەلاتا سوریا نەڤیا ناڤێ خوە یێ دروست ئاشکەرا بکەت، ب ڤی رەنگی بەحسێ چیرۆکا خوە د گەل داعش دکەت.
حەنان دبێژیت: “برایێ من له‌شكر بوو پشتی ھاتیە کوشتن چەکێ وی ل مال بوو، دەمێ تیروریستێن داعش ھاتینە باژێرێ مە خەلکی گۆتە داعش ڤێ مالێ چەکێ ھەيی و داعش ھاتن بابێ من گرت و بر.
دایکا من و دو خووشکێن من رەڤین، پشتی ھێنگێ ئەس چوومە بارەگایێ داعش دا کو تشتەکی ژ بابێ خوە بزانم، بەرامبەر ئازاد کرنا بابێ من ئەس ژ نه‌چارى رازی بووم شوو ب پوليسەکێ داعش بکەم ب ناڤێ (ئەبۆ محه‌مه‌د ئەلعيراقی)، کەسەکێ بلند و رەش ئەسمەر و خودان ریهـ و پرچەکا درێژ بوو، بەلێ ناڤی وی یێ درست من دزانی.
ھەر ژ شەفا ئێکێ من چ ھەست و ڤیان ل دەف نەدیتن کەسەکێ دل رەق و زالم بوو، دەمێ ب شەف دنڤست چەکێ خوە دانا بن سەرێ خوە وی گومان ژ ھەر کەسەکی ھەبوو حەتا دەرگەهـ بۆ ھەموو کەسان ڤەنه‌دکر، قانوونێن داعش ل سەر خەلکی د سەپاندن و وی ب خوە پێگری پێ نەدکر، وەکو جگارەکێشانێ، د شەریعەتی وان دا نابیت کەسێ جگارە کێشابان، لێ وی ل مال ب دزی ڤە دکێشان، گەلەکێ زالم بوو ھەموو ده‌مان ئەس د قوتام و هەتا نەدھێلا ب تله‌فونێ د گەل مالا خوە ژی باخڤم.
پشتی بەرزەبوونا وی ب چەند روژەکا دەنگ و باسێ کوشتنا وی به‌لاڤ بوو، داعش گۆتە من دڤێت شوو ب کەسەکێ دی بکەيی ھەر ژ ھەڤالێن وی ب خوە، لێ د وی دەمی دا من بڕیارا رەڤێنی دا و ئەس بەر بتورکیا چووم و نوکە ل تورکیا دژیم.
