باندۆرا په‌یڤ و ئاوازان
به‌شیر بۆتانی
باندۆرا په‌یڤان ل سه‌ر هه‌لبه‌ستڤانان و باندۆرا ئاوازان ل سه‌ر هونه‌رمه‌ندان پڕه و ئه‌ڤ دیارده‌كا خوه‌زایی یه و د ڤی بابه‌تی دا دخوازم به‌حسێ دو ئاواز و سێ هه‌لبه‌ستان بكم
سترانا یه‌كێ (لێ گولێ)، ناڤه‌رۆكا وێ ئه‌ڤینی یه، سترانه‌كا مللی یه كو ژێده‌رێ وێ ژ ده‌ڤه‌را بۆتانه یا كو ب ده‌نگێ ڤان هونه‌رمه‌ندێن مه‌زن حه‌سه‌ن جزیری و محه‌ممه‌د عارف جزیری به‌لاڤ بوویه.
لێ گولێ، لێ لێ گولێ
حه‌لاوا تێركاكلێ
حه‌لاوا تێركاكلێ
من خواری ژ عشق و دلێ
ئه‌مان ئه‌مان یار یار گولێ
ده‌خیل ئه‌مان یار یار گولێ
من خواری ژ عشق و دلێ
سترانا دویێ (به دایم دڵ تۆی ده‌وێ)، ناڤه‌رۆكا وێ ئه‌ڤینی یه، ب زاراڤا سۆرانی یه و ب ده‌نگێ مامۆستا عه‌لی مه‌ردان به‌لاڤ بوویه، یا كو ئاوازا وێ هه‌ر وه‌ك ئاوازا سترانا یه‌كێ یه، لێ هه‌لبه‌ستا سترانێ نوویه.
به دایم دل تۆی ده‌وێ
هیچ نانوێ ڕۆژ و شه‌وێ
به بینای هه‌ردوو چاوم
قه‌زای تۆی لێ دوور كه‌وێ
هیچ نانوم ڕۆژ و شه‌وێ
و ئه‌گه‌ر ئه‌م ب هووری ل په‌یڤێن ڤان هه‌ردو سترانێن ناڤبری یا كورمانجی و سۆرانی بنێڕن، ده‌ردكه‌ڤت كو هه‌لبه‌ستا كورمانجی ب خوه مللی یه و یا سۆرانی ب خوه هه‌لبه‌سته‌كا نوویه.
سترانا سێیێ (ئای لێ گولێ)، ناڤه‌رۆكا وێ سیاسی یه، ژ په‌یڤێن هه‌لبه‌ستڤانێ مه‌زن عه‌مه‌رێ له‌علێ یه و وه‌ك من دبهیست كو عه‌مه‌رێ له‌علێ هه‌لبه‌ستێن خوه ژی ب ئاوازێن جودا دخواندن و ئاوازا به‌ندێ یه‌كێ ژ ڤێ سترانێ ب خوه یا وی یه، لێ ئاوازا به‌ندێ دویێ ژ ڤێ سترانێ ژ یا سترانا مللی هاتیه وه‌رگرتن. ئه‌گه‌ر ئه‌م ب هووری ل ناڤێن ڤان هه‌ردو سترانێن كورمانجی بنێڕن پڕ نێزیكی هه‌ڤدو نه.
لێ گولێ
ئای لێ گولێ
لێ ناڤه‌رۆكێن ڤان هه‌ردو هه‌لبه‌ستان ژ هه‌ڤدو پڕ جودانه و بۆ مه ده‌ردكه‌ڤت كو باندۆرا سترانێن ده‌ڤه‌را بۆتان یێن فۆلكلۆری ل سه‌ر عه‌مه‌رێ له‌علێ هه‌یه و ب خوه ئاوازێن ڤان هه‌ردو سترانان ژی نێزێكی هه‌ڤدونه و دكارم ببێژم كو فۆلكلۆرێ ده‌ڤه‌را بۆتان جانێ وی بوو، له‌ورا ئه‌وی ب خوه ئه‌ڤ سترانا سیاسی په‌یدا كر و پشتڕا ب ده‌نگێ هونه‌رمه‌ند محه‌ممه‌د شێخۆ به‌لاڤ بوویه.
ئای لێ گولێ، گولا منێ
شێرینا ل به‌ر دلێ منێ
گولێ نادم ب مالێ دنێ
و ل سه‌ر گولێ تێم كوشتنێ
گولێ كه‌سك و سۆر و زه‌ره
نیشانا ئالێ ل سه‌ره
ئێدی ڕه‌نگسپی- گه‌وهه‌ره
شێرین و په‌یمانا منێ
ناڤداری و نه‌مری بۆ محه‌ممه‌د عارف جزیری، حه‌سه‌ن جزیری، عه‌لی مه‌ردان، عه‌مه‌رێ له‌علێ و محه‌ممه‌د شێخۆ بن.
