25 هزار كه‌س ژ پرۆژێ جلكێن بێ به‌رامبه‌ر مفاداربووینه
ئه‌ڤرۆ، ئه‌میر ئه‌ترووشی:
رێكخراوا VNG یا هوله‌ندی ب هه‌ڤكاری ل گه‌ل رێڤه‌به‌ریا گشتی یا باژێرڤانیان ل پارێزگه‌ها دهوكێ و سه‌رۆكاتیا باژێرڤانیا دهۆكێ و رێكخراوا (SOSD) یا لوكال، ب رێیا پرۆژه‌یه‌كێ كۆمكرنا جلكان كو سندوق ل 11 جهێن سه‌نته‌رێ پارێزگه‌ها دهۆكێ و سێمێلێ هاتینه دانان، خه‌لك جلكا دكه‌ته د وان سندوقان دا و پشتی دهێنه وه‌رگرتن و شووشتن و ئۆتیكرن، ئه‌و جلك بێ به‌رامبه‌ر ل سه‌ر خه‌لكی دهێنه دابه‌شكرن.
ب ئاماده‌بوونا ئه‌ندازیار دیار به‌حری ره‌سول، رێڤه‌به‌رێ گشتیێ باژێرڤانیان و مستر میشێل ئاخت، نوونه‌رێ ئاژانسا هه‌ماهه‌نگیا نێڤده‌وله‌تی یا باژێرڤانیێن هۆله‌ندا ل پارێزگه‌ها دهۆكێ، 11 سندوق ل سه‌نته‌رێ پارێزگه‌ها دهۆكێ سێمێلێ و ته‌ناهی دانان و گۆت: دابه‌شكرنا وان جلكان ب شێوه‌یه‌كێ رێكخراوه‌یی بوویه، به‌رده‌وام دهێنه دابه‌شكرن و چالاكیا پاركا نه‌وروز ب تنێ نیشادانه‌ك بوو و گه‌له‌ك جاران ئه‌ڤ جلوبه‌رگه ل كه‌مپان ژی دهێنه دابه‌شكرن.
ئه‌ندازیار دیار به‌حری دیار كر، وه‌كو گرنگیدان ب ژینگه‌هێ بۆ هندێ گلێش و به‌رمایك كێمتر لێ بهێن، ئه‌ڤ سندوقه بۆ به‌خشینا جل و به‌رگێن هاوولاتیان هاتنه دانان و مفا ژێ دهێته وه‌رگرتن بۆ كه‌سێن كێم ده‌رامه‌ت.
خویاژی كر، ئه‌ڤ جل و به‌رگێن بالا ئه‌وێن ژ وه‌لاتێ ده‌رڤه دهێن پتریا وان ژ ڤان سندوقا دهێن و ل پتریا وه‌لاتان ئه‌ڤ سندوقه هاتینه دانان، چونكو ئه‌ڤ جلكێن خه‌لك دهاڤێژن ده‌مێ دچنه كارگه‌ها ڤاڤارتنا گلێشی هیچ مفا ژێ ناهێته وه‌رگرتن و پاره لێ دهێته مه‌زاختن هه‌تا دهێته بنئاخكرن و ڤاڤارتن، ژ به‌ر هندێ بیرۆكه ئه‌و بوو ئه‌ڤ جلكه بهێنه كۆمكرن و مفا ژێ بهێته وه‌رگرتن.
ئه‌ندازیار دیار سادق، به‌رپرسێ پشكا ژینگه‌هێ ل رێڤه‌به‌ریا گشتی یا باژێرڤانیان دیار كر كو ل گۆه‌ری ڤه‌كۆلینا ل سالا بۆری یا 2020 هاتیه كرن، ئه‌و گلێشێ دهێته كۆمكرن نێزیكی 7% جلك و پێلاڤ و چانته‌نه و ئه‌ڤ سندوقێن هاتینه دانان بۆ دووباره مفا وه‌رگرتنێ یه ژ جلكێن بكارهاتی و گۆت: ڤی پرۆژه‌ی زێده‌تر ژ 25 هزار مفاداران هه‌نه و مه ل به‌ره ل قه‌زایێن دی ژی ئه‌ڤ سندوقه بهێنه دانان، چونكو ئه‌ڤه پرۆژه‌یه‌كێ ژینگه‌هی یه.
ئه‌ندازیار دیار ئه‌و ژی ئاشكرا كر، ئه‌ڤ سندوقه ل هه‌موو جیهانێ هه‌نه و سندوق ژ پلێتی هاتینه چێكرن و ژه‌نگی نابن و ب دیزاینه‌كا جوان هاتینه چێكرن. پشتی دهێنه كۆمكرن دێ هێنه شووشتن و ئۆتیكرن و جاره‌كا دی دێ ل سه‌ر كێم ده‌رامه‌تان هێنه دابه‌شكرن.
ل پاركا نه‌ورۆز ل باژێرێ دهۆكێ چالاكیه‌ك هاته كرن و ئارمانج ژ ڤێ چالاكیێ ئه‌و بوو ل جهێ جلكێن كه‌ڤن یێن خه‌لكی تێكه‌لی گلێشی ببن و كه‌س مفا ژێ نه‌وه‌رگریت، ب خه‌لكێ پێدڤی بهێنه دان. ئه‌ڤه‌ژی ژ لایه‌كێ دێ بیته ئه‌گه‌رێ كێمكرنا پیس بوونا ژینگه‌هێ و ژ لایه‌كێ دیڤه دێ بیته هاریكاریه‌ك بۆ كه‌سێن كێم ده‌رامه‌ت و پێدڤی.
د ڤێ ده‌ربارێ دا دیار به‌حری ره‌سوول، رێڤه‌به‌رێ گشتی یێ باژێرڤانیان ل پارێزگه‌ها دهۆك دیار كر، ئه‌ڤه ب تنێ پێشانگه‌هـ و نیشادانه‌ك بوو كو ب شێوه‌یه‌كێ رێكخستی ئه‌ڤ جل و به‌رگه ل سه‌ر كه‌سێن پێدڤی پێ هه‌ی نه‌هاتنه دابه‌شكرن، هه‌ر كه‌سێ دخواست دشیا ل ڤێ پیشانگه‌هێ ئاماده ببیت و جلوبه‌رگان ل دویڤ دلێ خۆ بۆ خوه ببه‌ت.
رێڤه‌به‌رێ گشتی یێ باژێرڤانیان ل پارێزگه‌ها دهۆكێ هه‌روه‌سا راگه‌هاند، پشتی خه‌لك جلوبه‌رگان د سندۆقێن تایبه‌ت یێن كۆمكرنا جلوبه‌رگان دا دانان، ئه‌ڤ جلوبه‌رگه دهێنه ڤه‌گوهاستن بۆ كارگه‌هێ و ڤاڤارتن بۆ دهێته كرن و جلكێن دوباره ب كێری بكارئینانێ دهێن دهێنه جوداكرن و پشتی پاقژكرن، شووشتن و ئۆتیكرنا وان جلكان ب شێوه‌یه‌كێ رێكخستی ل سه‌ر كه‌سێن پێدڤی پێ هه‌یی دهێنه دابه‌شكرن.
