د.جه‌نان نوری: گه‌له‌ك ژن پشتی زارۆبوونێ تووشی تێكچوونێن ده‌روونی دبن
ئه‌ڤرۆ، به‌رپه‌رێ ساخله‌میێ:
پشتی ژنێ زارۆ دبیت گه‌له‌ك تشت د ژیانا وێ دا دهێته گوهۆڕین كارتێكرنه‌كا مه‌زن ل ژیانا وێ دهێته كرن و ده‌روونێ وێ تێك دچیت و بێهنا وێ ته‌نگ دبیت.
د. جه‌نان نوری حه‌سه‌ن، تایبه‌تمه‌ندا ژن و زارۆبوونێ دا دیار كرن ٩٠% ژنێ پشتی زارۆ دبیت تووشی تێكچوونا ده‌روونی دبیت و دهێته دابه‌شكرن بۆ دو جوران، جورێ ئێكێ رێژا تێكچوونا ده‌روونی یا كێمه كو به‌رده‌وام یا ژ خۆ توره‌یه، بهێن ته‌نگی یا ل ده‌ف هه‌یی و بێ ئه‌گه‌ر دكه‌ته گری هه‌رده‌م هزرا دكه‌ت دێ تشته‌ك ل وێ یان زارۆیێ وێ هێت، به‌لێ ناگه‌هیته هندێ لاشێ خۆ ب ئێشینیت.
دا زانین ژی كو جورێ دوێ رێژا تێكچوونا ده‌روونی یا زۆره، هزر دكه‌ت دێ ئێك ئێشینیت و هنده‌ك جارا دگه‌هیته وی راده‌ی لاشێ خۆ ب ئێشینیت و داویێ ب ژیانا خوه بینیت.
تایبه‌تمه‌ندا ژن و زارۆبوونێ دا دیار كرن كو دوگیانی گه‌له‌ك یا هه‌ستیاره هورمون تێك دچن هنده‌ك كێم دبن هنده‌ك بلند دبن تایبه‌ت ژ دووماهیێ ڤه كارتێكرنه‌كا مه‌زن ل هه‌ستێن ژنێ دهێته كرن ل ده‌مێ زارۆ ژی دبیت هزرا هندێ ناكه‌ت ژان هند یا ب ئێشه وه‌كو شوكه‌كێ بۆ دروست دبیت و تێكچوونا ده‌روونی پتر لێ دهێت.
نوشدارێ دا دیاركرن تێكچوونا ده‌روونی دبیته ئه‌گه‌رێ:
١. ژن خوارنا خۆ كێم بكه‌ت یان هه‌ر نه‌خۆت.
٢. كێمبوونا ڤیتامینا و شیری یان هشكبوونا شیری.
٣. برین ژ ئه‌گه‌رێ زارۆبوونێ زوو چاره نابن.
٤. پشت گوهـ هاڤێتن و نه‌چاڤدانا زارۆی.
د. جه‌نانێ دا دیاركرن دا كو ژن ژ ڤێ نه‌خۆشیێ قورتال بیت یا پێدڤیه ل ده‌مێ دوگیانیێ بۆ نوشدارا خۆ دیار بكه‌ت كا چ ل ده‌ف په‌یدادبیت دا چاره‌سه‌ریا وێ بهێته كرن و یا ئاماده‌بیت ژ لایێ له‌شی و ده‌روونی ڤه، به‌ری زارۆ بهێته ل سه‌ر دونیایێ، دیسان مالا وێ و هه‌ڤژینێ وێ هاریكاریا وێ بكه‌ن و ده‌روونێ وێ ئارام بكه‌ن.
