وه‌زاره‌تا ساخله‌میێ پێداچوونێ د بهایێ ده‌رمان دا دكه‌ت
هه‌ولێر، قائید میرۆ:
د چارچوڤێ ب رێڤه‌چوونا كۆنفڕانسێ دویێ یێ سه‌ندیكا ده‌رمانسازێن ئیراق و هه‌رێما كوردستانێ وه‌زیرێ ساخله‌میێ ئاشكرا كر، پێنگاڤێن باش بۆ چاكسازیێ د ناڤا كه‌رتێ ده‌رمانان دا هاتینه هاڤێتن و بڕیاره كوده‌ك ل سه‌ر ده‌رمانان بهێته دانان بۆ دیاركرنا ژێده‌رێ وان.
دكتۆر سامان به‌رزنجی، وه‌زیرێ ساخله‌میێ ل حوكمه‌تا هه‌رێما كوردستانێ د كۆنگره‌یه‌كێ رۆژناڤانی دا راگه‌هاند: “چاكسازی د كه‌رتێ ده‌رمانان دا هاتیه ده‌ستپێكرن و پرۆسا ئینان و برنا ده‌رمانان ل گه‌ل بابه‌تێ عمباركرن و كۆمپانیێن ده‌رمانان هاتیه رێكخستن، ئینانا ده‌رمانان هه‌موو ب رێیا كۆنتڕۆلا ده‌رمانانه و بێی هه‌بوونا مه‌رجێن حوكمه‌تێ و زانستی رێك ناهێته دان ده‌رمان بهێنه د ناڤا هه‌رێما كوردستانێ دا، ب تایبه‌تی دیاركرنا بهایێ ده‌رمانان ب شێوه‌یه‌كێ زانستی و سه‌رده‌میانه”.
دكتۆر سامان به‌رزنجی ئاماژه ب وێ چه‌ندێ ژی كر كو وه‌زاره‌تا ساخله‌میێ پێداچوونه‌كا ته‌مام د بهایێ ده‌رمانان دا كریه و به‌رژه‌وه‌ندیا وه‌لاتیان بۆ دیاركرنا بهایێ ده‌رمانان به‌رچاڤ هاتیه وه‌رگرتن و گۆت: “مه ل به‌ره كۆده‌كی ل سه‌ر هه‌موو ده‌رمانان ب دانین و ده‌مێ وه‌لاتی ده‌رمانه‌كی دكڕیت ب رێیا لێدانا ئه‌ڤی كۆدی دێ هه‌موو هووركاریێن ئه‌ڤی جۆرێ ده‌رمانی زانیت، ئه‌ڤه ژی دێ بیته ئه‌گه‌ره‌كێ سه‌ره‌كی بۆ كێمبوونا ده‌رمانێن كوالێتی نزم و دیاركرنا ژێده‌رێ ده‌رمانان”.
