پێله‌كا زكچوون و دلرابوونێ ل دهۆكێ په‌یدابوویه
دهۆك، شڤان لقمان:
د. هه‌كار مسته‌فا، تایبه‌تمه‌ندێ نه‌خۆشیێن دل و هناڤا و شاره‌زایێ ته‌نگاڤیا دیاركر ماوێ چه‌ند روژانه پێله‌كا زكچوون و دلڕابوونێ به‌لاڤبوویه ل باژێرێ دهۆكێ و گۆمان دهێته‌كرن كۆلێرابیت و گۆت: ئه‌گه‌ر ئه‌ڤ په‌تایه یا به‌رده‌وام بیت پێشبینی دهێته‌كرن رێژەكا زوور یا نه‌خۆشا دناڤا نه‌خوشخانان دا بهێنه نڤاندن.
د. هه‌كار مسته‌فا دازانین ب شێوه‌یه‌كێ گشتی ب رێكا خوارن و ڤەخوارنا پیس دهێته ڤه‌گوهاستن، بو خوپاراستنێ ژ ڤێ په‌تایێ خوه دووركرن ژ خوارنێن ژ ده‌رڤه ب تایبه‌ت خوارنا قودیك كری (معلبات) و هه‌كه گومان هه‌بن خوارنه‌كا نه ته‌ندروسته، هه‌روه‌سا به‌ری خوارنێ و پشتی خوارنێ و چوونا ته‌والێتێ پێدڤیه 20حه‌تا 30 چركا ب ئاڤ و سابوونێ ده‌ستێن خوه بشووی، هه‌روه‌سا پێدڤیه ئاڤ بهێته گه‌رمكرن و پاش بهێته ب كارئینان بو ڤه‌خوارنێ و خوارنێ هه‌روه‌سا ددان شووشتنێ، بو خوپاراستن ژ ڤێ په‌تایێ خوه ب پارێزه ژ كرنا مه‌له‌ڤانیا د مه‌له‌ڤانگه‌هاندا هه‌روه‌سا مه‌له‌ڤانیكرن دناڤا ئاڤا رووبار و سكران دا .
تایبه‌تمه‌ندێ دل و هناڤا خویاكر كه‌سێن تووشی ڤێ په‌تایێ بووین ئه‌م موغه‌زی بو ب كاردئینین كو دبێژنێ (O R S) كو هه‌ر كیسه‌كێ ڤیی مغه‌زیێ تو دشێی بو لێتره‌كا ئاڤێ ب كاربینی و گۆت: هه‌ر ده‌مێ زكچوون په‌یدابوو پێدڤیه ئێك گلاسێ ڤێ ئاڤێ ڤه‌خووی داكو قه‌ره‌بوویا وان كانزا و ڤیتامینا بكه‌ی یێن ژ له‌شێ ته ده‌ركه‌تین.
د. هه‌كار مسته‌فا گۆت: ل ده‌مێ دلرابوون و زكچوون یا زوربیت پێدڤیه نه‌خۆش ماوێ 24 ده‌مژمێرادا سه‌ره‌دانا نه‌خوشخانێ بكه‌ت و ژلایێ نۆشداریڤه چاره‌سه‌ری بو بهێته كرن.
و ل دوماهیێ د. هه‌كار مسته‌فا تایبه‌تمه‌ندێ دل و هناڤا و شاره‌زایێ ته‌نگاڤیا دیار كر ده‌مێ زكچوون و دلرابوونا نه‌خۆشی زورا تۆندبیت وی ده‌می پشكنینێن ده‌ستاڤا ستویر بو دهێنه ئه‌نجامدان و ل دووڤ ئه‌نجامێ پشكنینان دێ ده‌رمانێ دژی به‌كتریا ب نه‌خوشی هێته‌دان، هه‌روه‌سا هه‌كه ژیێ نه‌خوشی ژ 70 سالان زێده‌تربیت یان نه‌خوشیێن دومدرێژ هه‌بن وه‌كی نه‌خۆشێن په‌نجه‌شێرێ و نه‌خوشیێن گولچیسكان هه‌بن، یان ژن یا دوگیان بیت و دلرابوون و زكچۆنه‌كا تۆند هه‌بیت پێدڤیه ده‌رمانێ دژی به‌كتریا بو بهێته‌بكارئینان، هه‌روه‌سا ئه‌گه‌ر زكچوون و دلرابوون زێده‌تر ژ حه‌فتیه‌كێ ل ده‌ڤ نه‌خوشی به‌رده‌وامبیت، هه‌روه‌سا هه‌كه پلا گه‌رماتیا له‌شێ نه‌خوشی 38.5 پله بیت و نه‌هێته خوار، یان خوین دگه‌ل ده‌ستاڤا نه‌خۆشی هه\بیت و ئه‌و نه‌خوشێن پتر ژ شه‌ش جاران د ده‌مێ 24 ده‌مژمێراندا زكچوون بو چێببیت، د ڤان حاله‌تا هه‌میاندا پێدڤیه ده‌رمانێ دژی به‌كتریا ب نه‌خوشی بهێته‌دان ژلایێ نۆشدارێ تایبه‌تمه‌ندڤه.
